Kredia për rrugën Qukës-Qafë Plloçë – Zvarritja e punimeve / Banka Islamike për Zhvillim miraton shtyrjen e disbursimit

Banka Islamike për Zhvillim ka miratuar shtyrjen e afatit për disbursimin e kredisë dhe periudhës së realizimit për segmentin rrugor Qukës-Qafë-Plloçë. Vendimi është marrë pas kërkesës së Ministrisë së Financave dhe Ekonomisë, për shtyrjen e datës së mbylljes së disbursimit deri në mars 2023. Ndërkohë që, në vendimin e saj Banka Islamike për Zhvillim kërkon përfundimin e të gjitha aktiviteteve të mbetura të projektit deri më 30 shtator 2021, për të mundësuar arritjen e mbylljes financiare të projektit deri në dhjetor 2021.

Në vendimin e saj, BIZH specifikon se kjo është shtyrja përfundimtare dhe se asnjë shtyrje tjetër nuk do të vlerësohet. Kredia për financimin e kësaj vepre u firmos në shkurt të vitit 2013, nga ish-ministri i Financave Ridvan Bode. Ndërkohë që, në ndonëse rruga është projektuar që në vitin 2010 ajo është ende larg përfundimit. Në shtator të vitit të kaluar ministrja e Infrastrukturës dhe Energjisë, Belinda Balluku bëri me dije se për përfunimin e saj nevojiten edhe 105.8 mln USD, prej të cilëve 56.8 mln USD për lotin I dhe II dhe 49 mln USD për lotin III, ndërkohë që nga aprovimi i fondit do të duheshin edhe 22 muaj për të dorëzuar veprën.

Gjatësia e segmentit Qukes–Qafe Plloce është 43,4 km, ndërsa ndahet në 3 lote. Deri 1 vit më parë, në lotin e parë ishin kryer 86.52% e punimeve, në lotin e dytë punimet kishin avancuar në masën 84.36%, ndërsa në lotin e tretë, në masën 51%. Ndërkaq, në qershor të këtij viti Balluku bëri me dije se ishin siguruar fondet për përfundimin e lotit 3. ksi Qukës-Qafë Plloçë është pjesë e korridorit rrugor Tiranë-Korçë dhe parashikon të ulë me 1 orë rrugën nga kryeqyteti për në juglindje.

ECURIA E PUNIMEVE NË AKSIN QUKËS QAFË-PLLOÇË

LOTI I me gjatësi 15.1 km – 86.52%

LOTI II me gjatësi 15.8 km – 84.36%

LOTI III me gjatësi 9.6 km – 51%

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.