Kredia për shtëpi/ Arriti në 117 miliardë lekë në fund të nëntorit 2019

Kredia për blerjen e banesave e dhënë nga sistemi bankar shqiptar ka arritur në 117 miliardë lekë ose rreth 950 milionë euro. Sipas të dhënave nga Banka e Shqipërisë, deri në fund të nëntorit ky portofol u rrit me 6.4% në raport me fillimin e vitit 2019.

Ulja e normave të interesit dhe rritja e fokusit të sistemit bankar në segmentin e individëve ka favorizuar zgjerimin e kredisë për pasuri të paluajtshme.

Bankat po fokusohen gjithnjë e më shumë te këto produkte, me qëllim një diversifikim më të lartë të portofolit të kredisë te klientët individë. Kreditë për blerje banesash kanë afate të gjata maturimi, çka mundëson një rritje të qëndrueshme të portofolit në kohë, por, gjithashtu, kanë edhe raportin më të ulët të kredive me probleme.

Kredia bankare është një nga faktorët kryesorë që e kanë gjallëruar disi tregun e pasurive të paluajtshme në vitet e fundit, sidomos në kryeqytet. Ulja e normave të interesit i ka shtyrë shumë familje të vendosin të blejnë një shtëpi të tyren për banim, por, në disa raste dhe si formë investimi.

Megjithatë, është e pritshme që tregu i pasurive të paluajtshme të pësojë një frenim, pas tërmetit të datës 26 nëntor. Kjo ndodhta do të ndikojë edhe ecurinë e portofolit të kredisë bankare me qëllim financimin e blerjes së banesave.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.