Kredia për shtëpi-Individët morën 11.5 mld lekë për 6-mujorin 2018
Individët kanë marrë rreth 11.5 miliardë lekë ose rreth 91 milionë euro kredi për të blerë banesa në gjysmën e parë të këtij viti. Sipas të dhënave nga Banka e Shqipërisë, kredia për shtëpi ngelet një ndër produktet me ecurinë më të mirë për sistemin bankar.
Shuma e kredisë së re është në nivele të përafërta me të njëjtën periudhë të një viti më parë, por kjo lidhet edhe forcimin e ndjeshëm të lekut ndaj euros. Në mesin e këtij viti, euro ka humbur afërsisht 7% të vlerës në kursin ndaj lekut krahasuar me një vit më parë. Afërsisht gjysma e kredisë së re për blerje të banesave është në monedhën europiane, ndaj, e zhveshur nga efekti i kursit të këmbimit, kredia për shtëpi është në rritje.
Kredia për shtëpi përbën rreth 21% të portofolit të kredisë së sistemit bankar shqiptar. Kredia për shtëpi po favorizohet edhe nga normave e interesit, që janë pranë niveleve më të ulëta historike, si për lekun, ashtu edhe për euron. Megjithë një përmirësimi të pjesshëm të tregut të pasurive të paluajtshme, momenti ngelet i favorshëm për të blerë, duke qenë se në vlera mesatare prej vitesh nuk po regjistrohet një rritje e çmimeve.
Sipas Bankës së Shqipërisë, indeksi i çmimit të banesave, në terma nominalë, nuk pësoi ndryshime të rëndësishme gjatë tremujorit të dytë të vitit 2018. I llogaritur në terma realë, duke zbritur normën e inflacionit, indeksi i çmimit të banesave regjistroi rënie prej 2.5%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.