Kredia për shtëpi – Për Tiranën ka arritur në 655 milionë euro
Kredia për blerjen e banesave në kryeqytet arriti në 80 miliardë lekë ose 655 milionë euro vitin e kaluar. Të dhënat e Bankës së Shqipërisë tregojnë se financimi i blerjes së pronave në kryeqytet u rrit me ritme të kënaqshme gjatë vitit të kaluar. Që nga fillimi i vitit, portofoli i kredisë u rrit me 6 miliardë lekë ose rreth 50 milionë euro.
Kredia bankare ka qenë një ndër faktorët kryesorë në mbështetjen e gjallërimit e tregut të pasurive të paluajtshme në kryeqytet.
Normat e ulëta historike të interesit kanë shtyrë shumë familje të blejnë prona, jo vetëm me qëllime banimi, por edhe si një formë interesante investimi.
Sipas Bankës së Shqipërisë, në fund të vitit të kaluar, interesi mesatar i kredive për blerje banesash, si për lekun, ashtu edhe për euron, ishte pranë nivelit 3.3%.
Veç interesave të ulëta, rritja e kredisë bankare është mbështetur edhe nga një lehtësimi i përgjithshëm i standardeve të huadhënies nga bankat për këtë produkt.
Kredia për blerjen e banesave është produkti me raportin më të ulët të kredive me probleme për sistemin bankar. Ky tregues vlerësohet të ketë arritur në më pak se 5% gjatë vitit të kaluar.
Rrjedhimisht, shumica e bankave po tentojnë të rriten në këtë produkt, me qëllim uljen dhe shpërndarjen më të mirë të rrezikut të kredisë.
Kryeqyteti ngelet tregu kryesor i investimit në pasuri të paluajtshme, siç dëshmon edhe shpërndarja e huasë bankare.
Qarku i Tiranës zë pothuajse 70% të kredive për blerje banesash të dhëna nga sistemi bankar shqiptar.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.