Kredia rurale- Shoqëritë e Kursim Kreditit zgjerojnë huadhënien me 14.3%

Kreditimi nga shoqëritë e kursim kreditit i është kthyer rritjes gjatë vitit 2016. Sipas të dhënave nga Banka e Shqipërisë, në fund të vitit 2016, portofoli i kredisë së këtyre shoqërive arriti në 5.5 miliardë lekë, në rritje me 14.3% krahasuar me një vit më parë.

Ky rezultat përfaqëson një kthesë të rëndësishme, pas rënies që kreditimi në këtë sektor pësoi në vitin 2015. Mikrofinanca dhe në veçanti skemat e kursim-kreditit janë një faktor i rëndësishëm i financimit të ekonomisë, sidomos në zonat rurale të vendit.

Ndonëse vlera totale e kredisë në këtë sektor përbën vetëm 1% të kredisë totale për ekonominë, kursim-krediti është një nga skemat më të suksesshme të mbështetjes me financim për fermerët e vegjël.

Kursim-krediti ka mbushur boshllëkun e shërbimeve financiare në zonat ku bankat apo institucionet më të mëdha nuk kanë leverdi të veprojnë. Duke filluar nga viti 2017, shoqëritë e kursim-kreditit janë përfshirë zyrtarisht në skemën e sigurimit të depozitave, çka përbën një bazë të rëndësishme për konsolidimin e mëtejshëm të tyre.

Jo rastësisht, gjatë vitit 2016, depozitat e publikut në këto shoqëri u rritën me 30% dhe arritën vlerën e afro pesë miliardë lekëve. Tashmë, depozitat mbulojnë 88% portofolit të kredisë, ndërkohë që tre vjet më parë ato financonin vetëm 65% të saj.

Mbështetja e kreditimit në depozitat e anëtarëve i bën këto shoqëri më të pavarura ndaj linjave të jashtme të financimit, por njëkohësisht forcon marrëdhënien me anëtarët e saj.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.