Kredia shtoi paranë në ekonomi – Oferta monetare u zgjerua me 4.3% në fund të 2019
Rritja e kredisë bankare ka mbështetur një zgjerim më të madh të ofertës së parasë në ekonomi. Sipas Bankës së Shqipërisë, treguesi i parasë së gjerë, agregati M3, në tremujorin e katërt 2019 shënoi rritje vjetore mesatare me rreth 4.3%. Kjo rritje ishte 0.7 pikë përqindje më e lartë se në tremujorin e tretë. Banak e Shqipërisë vlerëson se krijimi i parasë në ekonomi është mbështetura nga financimi më i madh nga sektori bankar, si për sektorin privat, ashtu edhe për atë publik.
Normat e ulëta të interesit, por edhe sezoni i festive të fundvitit nxisin edhe mbajtjen e parave në formë likuide, qoftë jashtë banka apo në llogari bankare pa afat. Agregati monetar që përfshin këta dy tregues u rrit me 9.6% në tremujorin e fundit të vitit.
Muaji dhjetor sjell zakonisht një rritje të treguesit të parasë jashtë bankave, çka ndodhi edhe në fund të vitit të kaluar. Megjithatë, raporti i parasë jashtë bankave ndaj totalit të parasë në monedhën vendase ishte pothuajse në të njëjtin nivel me tremujorin e tretë. Kjo tregon se shtimi i parasë jashtë bankave ka qenë në përpjestim me zgjerimin e ofertës monetare në lekë.
Një fenomen tjetër që vijoi të theksohej gjatë tremujorit të fundit ishte zhvendosja e kursimeve bankare të individëve në depozita mbi dy vjet. Këto depozita nuk përfshihen në llogaritjen e treguesit të parasë së gjerë në ekonomi, megjithatë tendenca e tyre është në rritje gjatë viteve të fundit. Në kushtet e normave të ulëta të interesit, një pjesë e individëve tentojnë të rrisin kthimet, duke i vendosur kursimet në depozita sa më afatgjata.
Sipas Bankës së Shqipërisë, portofoli i kredisë për ekonominë në tremujorin e katërt të vitit të kaluar u rrit me 7.8% ose 0.3 pikë përqindje më shumë se në tremujorin paraardhës. Rritja e kreditimit është mbështetur sidomos nga lehtësimi i ofertës dhe nga ndryshimi i pronësisë së disa bankave.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.