Kredia u rrit edhe në korrik! – Zgjerimi i portofolit po merr trajta të qendrueshme
Rritja e portofolit të kredisë për ekonominë po merr trajta të qëndrueshme. Banka e Shqipërisë raporton se, gjatë muajit korrik, kredia u zgjerua me afro 4.5 miliardë lekë. Në total, portofoli arriti vlerën e 557 miliardë lekëve, 4.5% më shumë krahasuar me korrikun e vitit të kaluar. Rritja e kredisë ka prekur normën më të lartë të rritjes vjetore në shtatë vitet e fundit.
Huadhënia nga sistemi bankar po zgjerohet, por, edhe po orientohet drejt afateve më të gjata të maturimit, çka e bëjnë rritjen e portofolit më të qëndrueshme në kohë. Një ndikim pozitiv ka dhënë edhe ulja graduale e efektit kredive të fshira nga bilancet. Që nga viti 2015, bankat kanë nxjerrë jashtë bilanceve mbi 55 miliardë lekë kredi të humbura. Kjo ka ndikuar në uljen e raportit të kredive me probleme, por, nga ana tjetër, ka ndikuar në tkurrjen e portofolit total të kredisë.
Rritja e portofolit të kredisë paraqitet e shpërndarë në dy segmentet kryesore të tregut, bizneset dhe familjet. Kredia për bizneset private ka arritur në 330 miliardë lekë, në rritje vjetore me 2.6%. Huadhënia për sipërmarrjet përbën rreth 60% të portofolit total të kredisë dhe ka një rol përcaktues në rritjen e kreditimit të ekonomisë shqiptare. Ky segment i tregut në në fund duket se po gjen frymëmarrjeje. Ndërsa kredia për segmentin e individëve vazhdon prej vitesh të ndjekë një tendencë pozitive dhe ka arritur në afro 192 miliardë lekë, me rritje vjetore me 5.4%.
Banka e Shqipërisë është optimiste se rritja e kredisë për ekonominë do të vazhdojë edhe më tej gjatë këtij viti. Normat e ulëta të interesit, ulja e kredive me probleme dhe mbyllja e ristrukturimit të sistemit përmes disa shitblerjeve të rëndësishme, janë të gjithë faktorë që do ta ndikojnë pozitivisht ofertën për kredi.
Ersuin Shehu/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.