Kreditë e këqija në Eurozonë bien në 2.63%, BQE: “Niveli më i ulët që kur nisi mbikqyrja, pavarësisht pandemisë”

Kreditë e këqija në bilancet e bankave të Eurozonës ranë në një rekord të ri të ulët në tremujorin e fundit 2020, duke injoruar paralajmërimet e Bankës Qendrore Europiane se huadhënësit janë përgatitur mirë për një valë të kreditit të keq pas pandemisë.  Norma e kredive me probleme (NPL) tek bankat e mbikëqyrura nga Banka Qendrore Europiane,  ra në 2.63%, që është niveli më i ulët që kur nisi mbikqyrja në 2015-n, pavarësisht recesionit të thellë që pritet të lë pasoja tek ekonomia për vite me radhë.  Bankat kanë arritur të përmirësojnë librat e kredive, falë garancive dhe skemave të kreditit nga Qeveria, që po mbajnë likuid sektorin korporativ, pavarësisht se një pjesë gjigante e sektorit të shërbimeve është mbyllur për thuajse 1 vit, prej masave të karantinës. Megjithatë, realiteti pritet të trokasë tek bankat, sipas institucionit në Frankfurt, që argumenton se disa huadhënës janë të papërgatitur dhe nuk kanë sisteme të mjaftueshme të alarmit.  Por bankat kanë një kapacitet të bollshëm për të absorbuar një rritje të kreditit të keq, pasi raporti i kapitalit bazë kundrejt aktiveve të ponderuara me risk (CET1), u rrit në 15.62%, që është gjithashtu norma më e lartë që kur nisi mbikqyrja.  Duke vënë në dukje pritshmëritë për përkeqësim të cilësisë së kreditit, provigjionet thuajse u dyfishuan vitin e kaluar, sipas institucionit, ndërsa përfitueshmëria kolapsoi, me treguesin e kthimit ndaj kapitalit (ROE) që ra në 1.53% në tremujorin e katërt, shumë poshtë kostos së kapitalit dhe normës prej 5.16% të viti të mëparshëm.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.