Kreditë me probleme – U ulën në 13.3% për muajin maj

Raporti i kredive me probleme u përmirësua sërish lehtë gjatë muajit maj. Sipas të dhënave nga Banka e Shqipërisë, raporti i kredive me probleme ishte 13.3%, ndërkohë që në mars kishte qenë 13.5%. Krahasuar me të njëjtën periudhë të një viti më parë, raporti i kredive me probleme ka rënë me rreth 2.5 pikë përqindjeje.

Gjatë gjithë pjesës së parë të këtij viti treguesi i kredive me probleme ka ruajtur një qëndrueshmëri që nuk regjistrohej prej shumë vitesh. Ndonëse niveli i kredive me probleme ngelet ende i lartë, përpjekjet e viteve të fundit kanë dhënë rezultate të mira dhe ky tregues ka zbritur në nivelet e vitit 2011.

Për të dhënë një shtysë në uljen e tyre të mëtejshme, Banka e Shqipërisë ka përgatitur një rregullore të re për trajtimin jashtëgjyqësor të kredimarrësve në vështirësi financiare. Kjo rregullore pritet të ndihmojë në zgjidhjen e rasteve të kompanive që kanë ekspozime të mëdha dhe të njëkohshme në disa banka të sistemit.

Siç theksoi guvernatori Sejko në daljen e të mërkurës, bilancet e bankave janë drejt shëndoshjes, ndërsa rreziku i kredisë paraqitet në rënie. Ai bëri sërish thirrje që bankat të tregohen më aktive në kredidhënie. Në fakt, rritja ende e pamjaftueshme sasiore e portofolit të kredisë ngelet një problem edhe në këndvështrimin e raportit të kredive të këqija. Një rritje e kreditimit do të ulte peshën specifike të kredive problematike ekzistuese.

Në fund të majit, portofoli i kredisë për ekonominë ka vlerën e më pak se 540 miliardë lekëve, 1% më pak krahasuar me të njëjtën periudhë të një viti më parë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.