Kreditë për strehim – MZHU bën bilancin, ja sa kanë përfituar në 2017

Ministria e Zhvillimit Urban bën me dije se ka vijuar programet e saj të strehimit duke mbështetur me pagesa si përfituesit e skemave të mëparshme edhe ata të rinj.

Nga të dhënat zyrtare rezulton se të paktën për periudhën janar-prill u shpenzuan për subvencionimin e interesave të kredive të buta 28.7 për qind e fondit total të planifikuar.

Buxheti ka parashikuar për strehimin 300 milionë lekë dhe konkretisht realizimi është 86 milionë lekë, dhe ku përfshihen subvencione interesash, pagesa të qirave, bonus qiraje për strehim dhe grante të menjëhershme për strehimin.

Në total në skemën e atyre që ju subvencionohen interesat janë 4097 familje ku përfitojnë kredi me interes zero 745 familje, me interes 3%, 3043 familje dhe me interes 4 për qind 127 familje.

Nga subvencioni i planifikuar për vitin 2017 përfitojnë qira edhe 44 familje, nga të cilat 26 familje në qytetin e Vlorës dhe 18 në qytetin e Tiranës në përputhje me përcaktimet në vendimet përkatëse të Këshillit të Ministrave.

Është parashikuar që të përfitojnë bonus strehimi 120 familje kurse me grante të menjëhershme të mbështeten 20 familje të tjera që plotësojnë kushtet për përfitim.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.