Kreditë me probleme, 14.5% – Në nivelin më të ulët që nga Dhjetori 2010

Kreditë me probleme u ulën sërish në muajin tetor, duke prekur nivelin më të ulët që nga dhjetori i vitit 2010. Sipas statistikave të Bankës së Shqipërisë, raporti i kredive me probleme ra më tej në 14.5%, nga 14.8% që kishte qenë në fund të shtatorit.

Shifrat tregojnë se ulja e kredive të këqija ka fituar një qëndrueshmëri në kohë dhe është në nivelet e viteve të para të krizës. Sipas bankierëve, pastrimi i kredive të vjetra problematike ka sjellë një tablo më realiste të portofolit të sistemit bankar.

Tashmë, efektin kryesor në uljen e raportit të kredive me probleme po e jep rritja, sado modeste, në kreditim, por edhe përdorimi i efektshëm i mekanizmit të ristrukturimit të hershëm të kredive.

Ulja e kredive me probleme po ndikon paralelisht në përmirësimin e performancës financiare të bankave. Raporti i kthimit nga kapitali, që mat fitimin kundrejt kapitalit aksioner, ngelet në nivele mëse të kënaqshme, me 16.3% për tetorin.

Të dhënat tregojnë se elementi kyç në rritjen e fitimeve këtë vit është pikërisht ulja drastike e shpenzimeve për provigjionimin e kredive me probleme.

Ndërkohë, edhe treguesit e kapitalizimit dhe likuiditetit të sistemit bankar ngelen mjaft të lartë, çka, mes të tjerash, tregon edhe potenciale të konsiderueshme për të rritur kreditimin. Për momentin, kjo rritje ngelet modeste, ndonëse në vlera pozitive.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.