Kreditimi “sheh më larg” – Rritet mbështetja për projektet afatgjata të investimit
Bankat po rrisin më tej kreditimin afatgjatë këtë vit, sinjal i një mbështetjeje më të madhe për projektet afatgjata të investimit të bizneseve dhe individëve. Sipas statistikave nga Shoqata Shqiptare e Bankave, kreditë afatgjata, me maturim më të gjatë se pesë vjet, në fund të shtatorit arritën në afro 312 miliardë lekë, në rritje me 6% krahasuar me një vit më parë. Kredia afatgjatë zë tashmë pothuajse 56% të portofolit të huasë bankare.
Në rritje është edhe kredia afatmesme, me afat deri në pesë vjet, me një rritje prej 8% krahasuar një vit më parë. Ndërkohë, kredia afatshkurtër, me afat maturimi deri në një vit ka rënë lehtë me 2% që nga shtatori i vitit të kaluar.
Rritja e kreditimit afatgjatë është një sinjal pozitiv, sepse dëshmon që bankat janë të gatshme të marrin përsipër më shumë rrezik në horizonte të gjata kohore. Rritja e maturitetit mesatar të portofolit lidhet së pari me qëllimet e përdorimit të kredisë. Kredia afatshkurtër shkon kryesisht për financimin e nevojave afatshkurtra të biznesit për likuiditetet. Overdraftet e biznesit për vite me radhë kanë qenë produkti më i madh i kredisë bankare për nga volumet.
Por, nëse llogarisim vetëm kredinë për sektorin privat, tashmë overdraftet e biznesit janë të katërtat për nga madhësia e portofolit, të lëna mbrapa nga kredia për prona dhënë individëve, kredia për pasuri të paluajtshme për bizneset dhe kredia për blerjen e makinerive dhe pajisjeve po nga bizneset.
Huadhënia afatgjatë krijon baza për një rritje më të qëndrueshme të portofolit të kredisë, duke shmangur nevojën për një rifinancim të shpeshtë të portofolit që maturohej brenda vitit. Nga ana e kërkesës, normat e ulëta të interesit kanë favorizuar një rritje të investimeve të bizneseve dhe individëve, sidomos kur bëhet fjalë për pasuritë e paluajtshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.