Kreu i PD, Basha vijon turin në Shëngjin: “Turizmi po lufton për mbijetesë. Qeveria dështoi të merrte masat e duhura”
Kryetari i Partisë Demokratike, Lulzim Basha ka qenë i pranishëm në Shëngjin të Lezhës, ku ka vijuar turin e tij të takimeve me sipërmarrës nga e gjithë vendi për të parë nga afër realitetin e situatës ekonomike.
Sipas kryedemokratit në Shëngjin ku sezoni turistik tashmë është hapur as 10% e strukturave hoteliere nuk kanë rezervime, ndërsa pjesa më e madhe e bar-restoranteve po punojnë me 30-40% të kapaciteteve, gjë e cila ka sjellë përgjysmimin e vendeve të punës.
Sipas z.Basha qeveria dështoi të merrte masat e duhura për të ndaluar zinxhirin e infeksionit të COVID-19, gjë e cila solli si pasojë edhe mbylljen e kufijve nga ana e Europës dhe që përkthehet në më pak turistë në vendin tonë.
Ndërkohë, përveç mungesës së turistëve bizneset në Shëngjin po përballen dhe me taksa e tarifa të rritura, me dyfishimin e faturave të energjisë, ujit dhe me tatimorët, ‘që në këtë kohë krize janë vërshuar si bandë mbi biznesin’, shkruan kryedemokrati.
Sipas tij, Partia Demokratike ka një plan të qartë për rimëkëmbjen e ekonomisë duke nisur me uljen e taksave dhe tarifave, orientimin e investimeve drejt sektorëve të rëndësishëm, duke hequr taksën “Rama” mbi karburantin dhe ndihmuar me subvencione sektorët e rëndësishëm që janë dhe furnizuesit e sektorit te turizmit, siç është bujqësia, peshkimi dhe të tjera.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.