Kreu i ri i Bankës së Anglisë – Britania nis gjetjen e një zëvendësuesi të Mark Carney
Ministri britanik i Financave, Philip Hammond, tha se ka nisur procesin e gjetjes së një zëvendësimi për guvernatorin e Bankës së Anglisë, Mark Carney. Carney ka zgjatur 2 herë mandatin e tij në krye të Bankës së Anglisë, në mënyrë që të ndihmojë ekonominë përgjatë Brexit. Por, ai ka përjashtuar një shtyrje tjetër të mandatit, pavarësisht se dalja e Britanisë nga Bashkimi Europian është ende “në ajër”.
Hammond tha se gjetja e një kandidati me aftësitë e duhura për të drejtuar Bankën e Anglisë është thelbësore për sigurimin e ekonomisë dhe për ruajtjen e pozicionit të vendit si qendra financiare më e madhe në botë. Carney mori detyrën më 1 Korrik 2013 dhe do të largohet më 31 Janar 2020. “Qëndrueshmëria e Carney ka ndihmuar ekonominë britanike në një periudhë të vështirë, ndërkohë që kemi inflacion të ulët dhe rritjen më të madhe të pagave në një dekadë”, tha Hammond.
Ministri i financave shtoi se shpreson që Brexit të mos ndërhyjë te aplikantët e mundshëm për këtë post. Procesi i rekrutimit është projektuar në një mënyrë që të caktohet kandidati më i kualifikuar.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.