Krijohet Agjencia e Financimit të Arsimit të Lartë! Kompetencë, shpërndarja e fondeve publike për universitetet dhe e bursave për studentët
Këshilli i Ministrave ka miratuar vendimin për ngritjen e Agjencisë Kombëtare të Financimit të Arsimit të Lartë. Referuar vendimit, Agjencia Kombëtare e Financimit të Arsimit të Lartë (AKFAL) do të organizohet dhe do të funksionojë si person juridik publik, në varësi të Ministrisë së Arsimit dhe Sportit, me seli në Tiranë.
Agjencia ka për mision shpërndarjen e fondeve publike për mbështetjen e veprimtarisë së institucioneve publike të arsimit të lartë, mbështetjen me bursa studimi për studentët dhe garantimin e skemës së kredive studentore, sipas kuadrit ligjor dhe nënligjor në fuqi.
Agjencia do të ketë si detyrë dhe përgjegjësi propozimin në Ministrinë e Arsimit dhe Sportit të kritereve dhe formulës për shpërndarjen e fondeve publike, të cilat miratohen nga kjo ministri. Po ashtu, në bazë të kritereve e të formulës së miratuar nga Ministria e Arsimit dhe Sportit, Agjencia shpërndan fondin për mbështetjen e institucioneve të arsimit të lartë dhe infrastrukturën akademike, shpërndan shpërndan fondin për projektet konkurruese për zhvillimin e institucioneve të arsimit të lartë, shpërndan fondin e mbështetjes studentore, garanton skemën e kredive studentore, sipas akteve nënligjore në fuqi si dhe miraton paraprakisht hapjen e programeve të reja të studimit në një institucion publik të arsimit të lartë, kur kërkohet që këto programe të financohen nga buxheti i shtetit.
Agjencia do të drejtohet nga drejtori i Përgjithshëm, i cili organizon dhe drejton të gjithë veprimtarinë e kësaj agjencie dhe përgjigjet para ministrit të Arsimit dhe Sportit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.