Krijohet Drejtoria e Përgjithshme e Thesarit – Do të jetë në varësi të ministrit të Financave dhe Ekonomisë
Këshilli i Ministrave ka miratuar sot vendimin për krijimin e Drejtorisë së Përgjithshme të Thesarit. Ky institucion do të jetë nën varësinë e ministrit të Financave dhe Ekonomisë, Arben Ahmetaj.
Sigurimi dhe realizmi i shërbimeve operacionale për qeverisjen e përgjithshme janë edhe misioni kryesor i kësaj drejtorie. Referuar vendimit, ajo ka stemën, logon dhe vulën e vet zyrtare. Lidhur me funksionet kryesore që do të kryejë ky institucion, përfshijnë:
Menaxhimin e mjeteve monetare për kryerjen e pagesave brenda kufijve të limitit të cash-it;
Kryerjen e pagesave në mënyrë të centralizuar dhe administrimin funksional të sistemit informatik financiar të qeverisë, në përputhje të plotë me kuadrin ligjor në fuqi, për procesin e ekzekutimit të buxhetit të shtetit dhe të raportimit financiar;
Regjistrimin, kontrollin, kontabilizimin dhe përpunimin e informacionit të transaksioneve të qeverisjes së përgjithshme;
Llogaritjen e vlerës për dëmshpërblimin e ish- të dënuarve politikë në mënyrë proporcionale dhe sipas radhës së numrit të pagesave;
Menaxhimin e procesit të shpërndarjes së dëmshpërblimit financiar të ish- të dënuarve politikë me transparencë dhe në kohë;
Hartimin e akteve nënligjore, të cilat prekin fushën e përgjegjësisë së institucionit dhe i propozohen ministrit përgjegjës për financat.
Sa i takon organizimit të brendshëm, strukturës si dhe organikës së Drejtorisë, ato do të miratohen me urdhër të kryeministrit. Ndërsa, degët territoriale drejtohen nga titullari i degës, i cili bën raportimin te drejtori i Përgjithshëm.
Sipas vendimit, struktura ekzistuese do të vazhdojë funksionimin e saj deri në fillimin e funksionimit të kësaj drejtorie. Ndërkohë, numri i punonjësve dhe fondet e miratuara për Drejtorinë e Përgjithshme të Thesarit në Ministrinë e Financave dhe Ekonomisë dhe për degët e thesarit kalojnë në Drejtorinë e Përgjithshme të Thesarit sipas këtij vendimi.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.