Krijohet Fondi për Sipërmarrjet Turistike me vlerë 30 mln lekë për 2017-2019, kriteret për të përfituar

Këshilli i Ministrave ka miratuar Krijimin e Fondit të Sipërmarrjes Turistike, të propozuar nga  Ministria e Zhvillimit Ekonomik, Turizmit, Tregtisë dhe Sipërmarrjes.

Për periudhën 2017-2019 fondi në total do të jetë 30 000 000 (tridhjetë milionë) lekë. Ndërsa vlera e fondit për secilin vit do të jetë 10 000 000 (dhjetë milionë) lekë.

Fondi i Sipërmarrjes Turistike u jep ndihmë financiare të drejtpërdrejtë ndërmarrjeve mikro e të vogla, që operojnë në sektorin e turizmit. Në varësi të projektit konkurrues, të përgatitur nga aplikantët, skema mbulon nga 60 për qind deri në 80 për qind të kostove të pranueshme dhe të miratuara, por jo më shumë se 1 000 000 (një milion) lekë.

Përveç fondeve të parashikuara në buxhetin e shtetit, Fondi i Sipërmarrjes Turistike mund të ketë si burim financimi edhe donatorë të ndryshëm apo institucione financiare ndërkombëtare.

Fondi ka për qëllim dhënien e ndihmës financiare në mbështetje të sipërmarrjeve turistike që zhvillojnë veprimtarinë e tyre në:

a) struktura akomoduese të llojit bujtinë, në zonat rurale;
b) agroturizëm dhe shërbime kulinare tradicionale të zonës.

Kush përfiton nga Fondi:

– Ndërmarrje të klasifikuara si mikro ose të vogla,

– Ndërmarrjet që kanë selinë ose vendin kryesor të ushtrimit të aktivitetit brenda territorit të vendit.

-Ofrojnë shërbime turistike brenda vendit;

-Paraqesin një projektpropozim ose planbiznesi duke demonstruar se aktivitetet e parashikuara për mbështetje nga Fondi i Sipërmarrjes Turistike janë të rëndësishme për zhvillimin e biznesit të tyre, duke pasur parasysh përdorimin e fondit për një investim afatgjatë;

-Janë të regjistruara në QKB dhe nuk kanë detyrime tatimore e doganore të papagura;

-Plotësojnë kriteret e legjislacionit të ndihmës shtetërore për ndihmën “De minimis”;
-Përfitojnë biznese që operojnë në tregun turistik, jo më pak se 1 vit.

Procedurat e aplikimit dhe kriteret për përzgjedhjen e përfituesve përcaktohen në rregulloren e funksionimit të Fondit të Sipërmarrjes Turistike, e cila miratohet nga ministri përgjegjës për ekonominë. Aplikuesit janë të detyruar të raportojnë pranë AIDA-s lidhur me zhvillimin e projektit dhe qëllimin për të cilin është përfituar ky fond, sipas afateve që do të përcaktohen në rregulloren e funksionimit të Fondit të Sipërmarrjes Turistike.

Eralda Zito/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.