Krijohet kadastra e pyjeve e kullotave – Baza referencë do jetë viti 1985, në regjistër pronësia, sipërfaqja e lloji i bimëve
Këshilli i Ministrave i ka hapur udhë krijimit të bazës së të dhënave të Regjistrit Kombëtar të Fondit Pyjor dhe Regjistrit të Fondit Kullosor në nivel vendor, rajonal e qendror. Vendimi përcakton strukturat që do të zngazhohen në krijimin e kadastrës së pyejeve e kullotave, ashtu si dhe llojet e të dhënave që do hidhen në regjistër.
Baza e informacionit fillestar në Regjistër, që shërben si vit bazë reference, do të jetë ai i vitit 1985. Si bazë për përpilimin e hartave shërbejnë hartat topografike të shkallës 1:25000 të përgatitura nga Instituti i Topografisë Ushtarake, të skanuara dhe të gjeoreferuara. Treguesit do të ndahen në tre grupe. Grupi i parë i treguesve kadastralë janë të dhënat identifikuese si vijon: a) qarku; b) bashkia c) ARZM-ja; ç) ekonomia pyjore; d) pjesa ekonomike; dh) ngastra; e) nënngastra; ë) përdorimi i territorit, i klasifikuar sipas këtyre kategorive: pyll, kullotë, livadh, djerrë, tokë me bimësi pyjore, sipërfaqe joproduktive. Në grupin e parë do të përfshihen gjithashtu edhe të dhënat mbi pronësinë dhe administrimin.
Grupi i dytë i treguesve kadastralë është përshkrimi i gjendjes së grumbullit pyjor, si vijon: a) formacion bimor drurë, shkurre; b) forma e qeverimit të grumbullit pyjor, sipas këtij klasifikimi: trungishte, cungishte, trungishte e përbërë, cungishte e përbërë, shkurre; c) funksioni kryesor: prodhues, pyje që kulloten dhe krasiten, mbrojtës, mbrojtjes+ prodhues, konservues, rekreacion; ç) faza e zhvillimit: tipi i pyllit; dh) kati: njëkatësh, dykatësh, shumëkatësh.
Në grupin e tretë përfshihen treguesit që dalin nga inventarizimi i grumbullit pyjor në sipërfaqet prove 200 x 200 m në rrjet kuadratik, për vlerësimin sasior dhe cilësor të tyre, si vijon: a) kurorëdendësia (kd); b) trungdendësia (td), rritja vijuese (Rv); c) rritja mesatare vjetore (Rmv); ç) vëllimi për ha dhe në total.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.