Krijohet nënkomisioni parlamentar “Për Zhvillim të Qendrueshëm”! Drejtohet nga Senida Mesi dhe është në përbërje të Komisionit të Ekonomisë
Parlamenti i Shqipërisë do të ketë një nënkomision parlamentar të emërtuar “Për Zhvillim të Qendrueshëm”. Propozimi është bërë nga kryetarja e Komisionit parlamentar të Financave dhe Ekonomisë Milva Ekonomi.
Ky nënkomision do të jetë në përbërje të Komisionit të Përhershëm Parlamentar për Ekonominë dhe Financat.
Referuar relacionit të nismës në Kuvend, fusha e përgjegjësisë së këtij nënkomisioni është zhvillimi ekonomik dhe social, rritja ekonomike e qendrueshme, realizimi i objektivave të zhvillimit të qendrueshëm dhe Agjenda 2030 e OKB ( Organizata e Kombeve të Bashkuara).
Nënkomisioni do të përbëhet nga 7 anëtarë, si më poshtë:
- Senida Mesi (kryetare)
- Edlira Hyseni (zëvëndëskryetare)
- Milva Ekonomi
- Almira Xhembulla
- Besnik Bare
- Vasil Sterjovski
- Halil Jakimi
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.