‘Krijohet’ Parku Kombëtar “Lurë-Mali i Dejës” – Ja sa do të jetë sipërfaqja e tij
Pas zgjerimit të Parku Kombëtar të “Malit të Tomorrit”, Ministria e Turizmit dhe Mjedisit ka vendosur të zgjerojë edhe Parkun Kombëtar të Lurës. Sipas vendimit të botuar në ‘Fletoren Zyrtare’, ky i fundit do të bashkohet me parkun Kombëtar “Zall Gjoçaj”, duke krijuar Parkun kombëtar “Lurë-Mali i Dejës”.
Propozimi i ministrit të Turizmit dhe Mjedisit, Blendi Klosi, është botuar sot në fletoren zyrtare dhe parashikon që ky park ‘i ri’ të ketë një sipërfaqe prej 20 244 78 ha.
Zona e zgjerimit të parkut përfshin sipërfaqe me tokë pyjore, shkurre dhe sipërfaqe ujore. Parku kombëtar “Lurë-Mali i Dejës” ndahet në tre nënzona, të cilat përfshijnë:
- Nënzonën qendrore që përfshin habitatet kryesore me pyje e shkurre dhe përcaktohet si zonë me vlera të larta për trashëgiminë natyrore
- Nnënzonën e përdorimit tradicional dhe e zhvillimit të qëndrueshëm, që përfshin tokat bujqësore, kullotat dhe territoret ujore
- Nënzona e rekreacionit, që përfshin pjesët e habitateve pyjore e ujore që krijohen nga diga e rezervuarit
Ministria e Turizmit dhe Mjedisit do të miratojë edhe planin e menaxhimit të Parkut Kombëtar, të hartuar nga AKZM-ja, brenda një viti nga hyrja në fuqi e këtij vendimi.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.