Krijohet “super” agjencia e shpronësimeve – Merr në përdorim të përkohshëm ose përfundimtar pronat për interes publik, negiocion me pronarët
Të gjitha institucionet shtetërore që kanë nevojë të shpronësojnë për hir të interesit publik do t’i drejtojnë agjencisë së sapokrijuar të shpronësimeve, duke e kthyer këtë të fundit në një prej dikastereve më të rëndësishëm në vend. Është zbardhur tashmë në Fletoren Zyrtare Vendimi për krijimin e kësaj “super” agjencie, përbërja e së cilës do të përcaktohet me urdhër të Kryeministrit, e cila do të ketë mision menaxhimin e procedurave të shpronësimit ose të marrjes në përdorim të përkohshëm, për interes publik, të pasurive të personave fizikë ose juridikë privatë në të gjithë territorin e Republikës së Shqipërisë.
Agjencia do të ketë kompetencë të plotë mbi përllogaritjen e vlerave përfundimtare të shpronësimit, masën e shpronësimit për çdo pronë të prekur nga projekti i shpronësimit; të Mbikëqyrë ecurinë e procedurave të procesit të shpronësimeve; po njëherësh edhe të hyjë në negociata me subjektet që shpronësohen, për sa i përket vlerës së shpronësimit dhe afatit të shlyerjes së kësaj vlere.
“Rregullat e hollësishme për mënyrën e negocimit me subjektet e shpronësuara do të përcaktohen nga Këshilli i Ministrave, me propozimin e ministrit përgjegjës për zhvillimin urban”, thekson në vendim Qeveria.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.