Krijohet tregu i balancimit të energjisë – Komuniteti i Energjisë: Moment historik për reformën, do ulen kostot për prodhuesit
Prej datës 1 prill kanë hyrë në fuqi rregullat e vendosura nga Enti Rregullator i Energjisë për krijimin e tregut të balancimit, duke mundësuar ndër të tjera uljen e kostove të balancimit për prodhuesit e energjisë elektrike. Sipas ERE-s, pjesëmarrësit e tregut tani mund të ofrojnë shërbime të balancimit bazuar në treg dhe janë përgjegjës për balancimin e tyre, duke krijuar grupe të përbashkëta balancimi. Vendimi për krijimin e tregut të balancimit është vlerësuar edhe nga Sekretariati i Komunitetit të Energjisë në Vjenë, që e ka konsideruar si moment historik në reformën e Shqipërisë në tregun e energjisë elektrike.
“Kjo është e rëndësishme veçanërisht për prodhuesit e pavarur të energjisë elektrike. Ky treg balancues siguron integrimin efikas të këtyre prodhuesve në tregun e energjisë elektrike dhe do t’i lejojë uljen e kostove të balancimit”,-thuhet në një njoftim për shtyp te Sekretariatit. Gjithashtu, sipas tij hyrja në fuqi e tregut të balancimit i hapi rrugën zgjidhjes së një mosmarrëveshjeje afatgjatë midis një investitori privat të HEC Ashta dhe prodhuesit publik KESH, në lidhje me përgjegjësinë e balancimit. Sipas ligjit “Për sektorin e energjisë eleketrike”, çdo pjesëmarrës i tregut të energjisë elektrike është përgjegjës për balancimin e energjisë elektrike”.
Ndërkohë që, pjesëmarrësit mund të rregullojnë përgjegjësinë për balancimin, nëpërmjet një kontrate me Operatorin e Sistemit të Transmetimit duke marrë statusin e palës përgjegjëse për balancim ose duke nënshkruar një kontratë për transferimin e përgjegjësisë së balancimit ndaj një pale tjetër përgjegjëse për balancimin, duke u bërë pjesëtar i një grupi balancues, në përputhje me rregullat e tregut”.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.