“Krijoni depozitat e sigurisë së naftës” – Kreu i Sekretariatit të Komunitetit të Energjisë: Është detyrim, por edhe garanci për qytetarët

Shqipëria duhet të përmbushë detyrimin për krijimin e depozitave të naftës deri në fund të vitit”. Kërkesa është bërë drejtori i Sekretariatit të Komunitetit të Energjisë, Artur Lorkowski, gjatë një deklarate për media me ministren e Infrastrukturës dhe Energjisë, Belinda Balluku, duke shtuar se ky jo vetëm që është një detyrim, por është edhe një garanci për mbrojtjen e qytetarëve shqiptarë.

Po ashtu ai komentoi edhe projektet e gazit, përmes shfrytëzimit të TAP, nën perspektivën rajonale.

Krijimi i depozitave të sigurisë ishte në fokus edhe gjatë shpalljes të Aktit Normatik për ngritjen e Bordit të Transparencës nga ana e qeverisë, në mesin e muajit mars. Në atë kohë, Balluku deklaroi se bordi do të niste kontrollet në terren për gjendjen faktike të depozitave të sigurisë, që përcakton legjislacioni në fuqi. Teksa paralelisht edhe vetë qeveria do të krijonte depozita shtetërore të naftës.

Ndërkaq, ndonëse Bordi mblidhet sistematikisht për të përcaktuar çmimet e tregtimit me shumicë dhe pakicë të karburanteve, deri më tani nuk është bërë publike asnjë e dhënë në lidhje me këto depozita.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.