Krimet ekonomike rriten me 46% – “Skifterat” i hapin rrugë mashtrimeve, ndërtimeve pa leje dhe shkatërrimit të pronës
Veprat penale kundër pasurisë, gjatë periudhës Korrik-Shtator shënuan një rritje të numri të rasteve nga 2700 në pothuajse 4 mijë. Shtimi i rasteve është shoqëruar dhe nga një numër më i lartë autorësh që kryejnë vepra penale në këtë kategori.
Ajo që bie në sy nga veprat e evidentuara është pothuajse dyfishimi i rasteve të shkatërrimit të pronës. Në 219 raste prona është shkatërruar duke i vendosur flakën, ndërsa në 271 raste të tjera janë përdorur mjete të tjera. Edhe rastet e shkatërrimit me eksploziv janë shtuar, nga 8 një vit më parë, në 14 për tremujorin e tretë të këtij viti.
Në krahasim me një vit më parë, vihet re dhe një ulje e ndjeshme e rasteve të vjedhjes së banesave, apo bizneseve. Për këtë periudhë janë regjistruar vetëm 278 raste vjedhjes shtëpish, nga 336 që ishin një vit më parë.
Megjithatë, numri total i rasteve të vjedhjes së pasurisë është rritur, prej shtimit të krimeve në kategori të tjera si vjedhja e energjisë elektrike, vjedhjet e automjeteve dhe trafikimi i mjeteve motorike.
Periudha Korrik-Shtator shënoi një shtim edhe të rasteve të mashtrimit ekonomik, nga 156 në 176 raste. Një tregues pozitiv është edhe shtimi i ndëshkueshmërisë për rastet e shkeljes së të drejtave të pronësisë industriale.
Edhe lufta kundër evazionit fiskal ka shënuar përmirësim, duke trefishuar veprat e evidentuara. Në total, veprat në lidhje me tatimet dhe taksat për tremujorin e 3-të regjistruan 286 raste.
Në pothuajse po kaq raste u evidentuan edhe veprat në fushën e falsifikimeve, ku për falsifikimin e letërnjoftimeve, pasaportave dhe vizave po procedohen 89 autorë, ndërsa 236 autorë të tjerë po ndiqen për falsifikime të tjera dokumentesh apo letrash me vlerë. Shqiptarët që tentojnë të lëvizin drejt vendeve të Bashkimit Europian dhe sidomos drejt Mbretërisë së Bashkuar kanë sjellë dyfishimin e kërkesave për pasaporta false.
Sakaq, veprat penale të evidentuara për ndërtim të paligjshëm u trefishuan, duke çuar për ndjekje 930 persona. Këta të fundit përbëjnë 11,4% të të gjithë numrit të autorëve të veprave penale në Republikën e Shqipërisë për këtë periudhë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.