Krimi kibernetik vetëm kurbë në ngjitje – Vitin e kaluar i kushton botës 600 miliardë dollarë

Sipas një raporti të ri, të McAfee, kostoja globale e krimit kibernetik tani ka arritur deri në 600 miliardë dollarë, shifër kjo që përbën  rreth 0.8 për qind të Prodhimit të Brendshëm Bruto.

Më shqetësuese se vetë shifra, është rritja masive nga viti 2014, ku analiza e njëjtë, tregoi se kostoja ishte vetëm 445 miliardë dollarë.

Kjo rritje e shpejtë ka ndodhur kryesisht për shkak të avancimeve në teknologji siç është Inteligjenca Artificiale dhe sipas Ian Yip, shef i teknologjisë së lartë në firmën e sigurisë kibernetike McAfee, kryerja e veprimtarisë kriminale në hapësirën kibernetike është bërë më e lehtë.  Ai shtoi se tashmë nuk është e nevojshme të kesh njohuri të avancuara në teknologji për të kryer një sulm kibernetik.

 “Kur shikoni koston, krimi kibernetik është pothuajse 14 % e fitimit të ekonomisë globale në internet, e cila në vitin 2016  ishte 4.2 trilionë dollarë”- tha McAfee për studimin.

Raporti vjen në një kohë kur sulmet në kriptovalutë janë në qendër të vëmendjes. Një shembull është rasti i fundit në Tokio, ku u vodhën pothuajse  534.8 milionë dollarë në formën e monedhave NEM. Kjo nuk është e para e këtij lloji, por sigurisht është një nga vjedhjet më të mëdha që ka ndodhur.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.