Kriminaliteti i shqiptarëve në Itali – 2.5 për çdo 100 banorë, dominojnë vjedhjet dhe droga
Kriminaliteti në Itali, sidomos mes të huajve, por edhe në Shqipëri së fundmi, është kthyer në çështje dite. Të dhënat e publikuara nga “Ilsole24ore”, dhe të përpunuara më tej nga `SCAN`, tregojnë se, norma e kriminaliteti te shqiptarët e Italisë fiksohet në 2.5 për çdo 100 banorë. Pra, 2.5% e shqiptarëve që jetojnë në Itali, sipas statistikave, është përballur në 2016 me një denoncim për një ndër veprat kryesore penale. Shqiptarët janë më të famshëm pikërisht për vjedhjet, me 5775 denoncime, ose 1.23 për çdo 100 banorë.
Pavarësisht opinionit publik, shqiptarët nuk janë të parët ndër kombësitë më të përhapura në Itali për krimet e natyrës penale, as në drejtim të vjedhjeve e as për vepra të tjera, si vrasje, përdorim i narkotikëve, shfrytëzim prostitucioni, etj. Thuajse në të gjitha kategoritë, shqiptarët janë të tretët në listë, pas rumunëve, dhe atyre nga Maroku.
Pavarësisht perceptimit, në harkun e 10 viteve të fundit, norma e kriminalitetit mes shqiptarëve në Itali thuajse është dyfishuar. Jo vetëm raporti për çdo 100 banorë, por edhe shira absolute është dyfishuar që prej vitit 2007. Asokohe numëroheshin vetëm 2414 denoncime për vjedhje , ose 0.64 për çdo 100 banorë.
Në vend të dytë të veprave penale renditen krimet që lidhen me narkotikët, 3373 të tilla, ose 0.72 cdo 100 shqiptarë. Në këtë kategori, shqipatrët janë të dytët në listë, vetëm pas shtetasve nga Maroku, sa i përket shifrës së denoncimeve, port ë tretët sa i përkket normës së kriminalitetit, pra në raport me banorët. Edhe në këtë vepër penale ka rritje të ndjeshme në krahasim me 2007.
Në vend të tretë ndërkohë klasifikohet vepra penale e plagosjes, me 1292 të tilla në 2016, ose 0.276 për çdo 100 banorë.
Në të gjitha veprat kryesore penale, numërohen rreth 11.800 denoncime në vit për shqiptarët. Shifrat mbeten të tilla vetëm për efekte statistikore dhe nuk kanë aspak për qëllim të ndërtojnë stereotipe apo të lidhin një kombësi të caktuar me nivelin e kriminalitetit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.