Kriptovalutat “rrëzojnë” kartat grafike – Rënia e prodhimit të monedhave ul kërkesën. Nvidia bie me 17%
Prodhuesi i kartave grafike, Nvidia, dha projeksione zhgënjyese për tremujorin e fundit, duke fajësuar rritjen e kartave të pashitura prej rënies së aktivitetit të “gërmimit” të kriptovalutave. Kompania me seli në Kaliforni, publikoi shitje poshtë projeksioneve për tremujorit e tretë dhe vlera në treg ra me 17%, në 168.3 dollarë për aksion. Prej dekadash, Nvidia ka ofruar karta që fuqizojnë grafikat e kompjuterave për të përballuar videolojëra, por në kohët e fundit, kërkesa ishte rritur nga prodhuesit e kriptovalutave, që përdornin kartat grafike për të gjeneruar Bitcoin apo monedha të tjera alternative.
Kompania deklaroi se çmimet e kartave grafike ishin rritur prej “etheve” të kriptovalutave, duke larguar blerësit e zakonshëm. Ndërkohë që këto “ethe” janë larguar dhe çmimet kanë rënë, Nvida pret që volumi i shitjeve të rritet përsëri, ndërkohë që blerësit e përjashtuar nga tregu do të rikthehen. Megjithatë, sipas kompanisë, ky proces ka qenë më i ngadaltë se ç’pritej dhe inventarët priten në nivele të mëdha deri në fund të vitit. Për rrjedhojë, Nvidia ndaloi dërgesat e disa prej kartave me çmim të mesëm ndaj shitësve me pakicë, që po “ngecin” nëpër magazina.
Kompania bëri të ditur se provigjonet për inventarët janë 5-fishuar në tremujorin e tretë në 70 milionë dollarë. Nvidia bëri të ditur se të ardhurat nga prodhuesit e kompjuterave personalë (PC) ranë me 40% për shkak të kërkesës më të ulët për produktet GPU, që përdoren për “gërmimin” e kriptovalutave. Muajin e Kaluar, rivali AMD, fajësoi rënien e kërkesës nga “gërmuesit” e kriptovalutave për të ardhurat e dobëta.
Klevis Llaha/’SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.