Kriza e COVID-19, Roden Pajaj në ‘Argument’: “Bizneset duhet të bëjnë këto veprime për të mbijetuar nesër”

Pandemia e koronavirusit u kthye në një ngjarje që tronditi thellë të gjithë botën nga ana sociale dhe ekonomike, duke shtruar kështu disa pyetje të reja mbi të ardhmen e asaj çfarë na pret në normalitetin e përditshëm.

Teksa krizat sjellin mjaft problematika, ato janë edhe një shanc i mirë për tu rikthyer më të fortë. Kjo ishte dhe tema në “Argument” me gazetarin Enio Civici për të parashikuar se si bota jonë do të ndryshojë, teksa një vaksinë duket ende larg për të kuruar virusin .

I ftuar për të diskutuar mbi këtë temë ishte Roden Pajaj, nga kompania Deloitte Albania. Sipas tij, kjo krizë do të lërë pasoja dhe se tani është koha nga lidershipet e biznesit për të marrë vendime të rëndësishme:

“Patjetër që kjo krizë që po kalojmë, do të lërë pasojat e veta në shumë aspekte. Puna është se sa lidershipi i bizneseve do ta menaxhojë mirë këtë pjesë dhe të dalë sa më mirë nga kjo fazë. Në këtë kohë ka ndryshuar edhe skematura për të bërë biznes. Është mjaft me rëndësi përqasja që do të ndjekë lidershipi biznesit për të nxjerrë mësime nga kjo krizë.

E para është të kuptojnë kush është forca e biznesit të tyre për t’iu përgjigjur një krize. Faza e dytë është ajo e rikuperimit, e cila është tepër kyçe dhe bizneset që do marrin vendimet e duhura sot, do mund të mbijetojnë. E treta është realiteti i ri dhe çfarë bizneset do bëjnë për t’iu përshtatur. “

Tranzicioni sipas Z.Pajaj do të jetë një fazë kritike për të përcaktar bizneset që do të mbijetojnë. Sipas tij, çdo sipërmarrës duhet të ndërmarrë tre veprime:

“Sa më shpejt të merren disa vendime, do të jetë më mirë. Janë tre veprime të rëndësishme për lidershipin e biznesit. E para është faza e reflektimit, për mësimet që mund të nxjerrin, faza tjetër është si do t’i integrojnë përsëri forcat e punës, kush mundet të punojë në distancë dhe kush mund të rikthehet më parë fizikisht.”

Gjithashtu sipas tij, bizneset duhet të bëjnë vlerësimin, pasi e ardhmja e punës do të jetë ndryshe sa i përket menaxhimit të burimeve njerëzore:

“E ardhmja e punës, duke patur parasysh se jemi në revolucionin e katërt që drejtohet nga teknologjia, ku tashmë flitet si do integrohet pjesa humane me robotikën dhe COVID-19 vetëm e thekson më tej këtë aspekt. Ne publikuam të dhënat nga sondazhi i Deloitte, e përfshirë dhe Shqipëria, ku një nga problemet ishte riaftësimi i forcës punëtore për të ardhmen. Në Amerikë 40% e punës bëhet nga persona që nuk janë të kontraktuar brenda ambientit të punës, prandaj edhe në Shqipëri do të vijë kjo tendencë. Sot , në çdo biznes është tepër i nevojshëm roli i Burimeve Njerëzore, që mund të ofrojë analiza dhe vlerësime të sakta për situatën e kompanisë. ”

Pyetur nga gazetari Civici mbi temën më të përfolur të kësaj krize, puna nga shtëpia, Z.Pajaj është përgjigjur se neovjiten disa vlerësime:

“Ky është momenti i duhur, për të vlerësuar se cfarë pozicione pune duhet të jenë në zyrë dhe cilët nga jashtë. E para, kërkohet teknologjia që t’i mundësojë punonjësve të lidhen dhe të punojnë nga distanca. E dyta është siguria e informacionit, që në Shqipëri investohet shumë pak. Nga ana tjetër është edhe kultura e punës, pasi ka nevojë për shumë trajnim, se si mund të bashkëpunosh me kolegët nga distanca dhe pjesa teteër është shëndeti mendor.”

G.K/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.