“Kriza e Demokracisë”, TI: Bota ka dështuar të kontrollojë korrupsionin
Dështimi botëror për të kontrolluar korrupsionin ka sjellë një krizë të demokracisë në të gjithë botën, sipas verdiktit të Indeksit të Perceptimit të Korrupsionit, të publikuar nga Transparency International.
Raporti vjetor rendit vendet sipas perceptimit të korrupsionit në sektorin publik dhe jo në prova të dokumentuara, e më pas rendit vendet në një shkallë nga 0 në 100, ku 0 nënkupton nivel të lartë korrupsioni dhe 100-a tregon se një vend është i “pastër”.
Danimarka dhe Zelanda e Re kanë kryesuar listën në vitet e fundit dhe për 2018-ën kanë mbajtur pozicionin e tyre. Danimarka mori 88 pikë, ndërsa Zelanda e Re ndoqi me 87.
Finlanda, Singapori, Suedia, Zvicra, Norvegjia, Holanda, Kanadaja, Luksemburgu, Gjermania dhe Britania, përbënë 10-shen kryesore. Vendet e perceptuara me nivelin më të lartë të korrupsionit janë Somalia, me 10 pikë, ndjekur nga Sudani i Jugut dhe Siria me 13.
Duke e ndarë në rajone, ai me performancën më të mirë ishte Europa Perëndimore dhe Bashkimi Europian, me një vlerësim mesatar prej 66 pikë. Europa lindore mori 35 pikë, ndërsa Amerika, një vlerësim mesatar prej 44.
Raporti analizon të dhënat në ndërthurje me të dhënat për demokracinë në të gjithë botën dhe shfaq një lidhje mes korrupsionit dhe gjendjes së demokracisë. Vendet që cilësohen si demokraci të plota kanë një mesatare prej 75 pikësh, ndërsa demokracitë e dobëta, në 49.
Raporti thekson një rënie të madhe të pikëve për Turqinë dhe Hungarinë, për shkak të tendencave autokratike të liderëve Erdoan dhe Viktor Orban. Brazili dhe SHBA pësuan gjithashtu rënie në vlerësim.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.