Kriza e veshjeve dhe këpucëve, Prençe: “Dy kërkesat për të shpëtuar sektorin”

Fabrikat e veshjeve dhe të këpucëve në vend, kërkojnë nga qeveria ndihmë për të gjetur tregje të reja për prodhimin e materialeve njëpërdorimshe apo veshjeve spitalore si dhe mbështetje me grante, si e vetmja rrugë për të dalë nga kriza në të cilën gjenden për shkak të pandemisë COVID-19. Në një intervistë për SCAN, kreu i Shoqatës Pro-Eksport Albania, Edvin Prençe, shprehet se pranë Ministrisë së Financave është ngritur një grup pune për këtë qëllim dhe bën apel që hartohet sa më shpejt një paketë e dedikuar për këtë sektor.

“Kemi paraqitur një kërkesë shumë të rëndësishme që është për krijimin e një Business House. Ne kërkojmë që nëpërmjet ndihmës së qeverisë shqiptare dhe donatorëve të krijohet një urë lidhëse sa i përket një tregu të ri që i përket materialeve një-përdorimshme ose veshjet spitalore. Bashkëngjitur Business House, nga qeveria kemi kërkuar edhe një pakete ndihme me grante ose kredi të buta, pasi për të përballuar kërkesat e tregut kemi nevojë edhe për një diverfisikim të makinerive të reja.

Po për të qenë sa më të shpejte dhe koherentë me kërkesat e klientëve duhet që këto makineri të jenë sa  më të shpejta brenda fabrikave tona dhe ne të jemi të gatshëm të japim prodhimin në sasitë e duhura dhe cilësitë e duhura me kërkesat e klientëve.”

Nga ana tjetër Prençe vë në dukje situatën e vështirë ekonomike me të cilën vijojnë të përballen kompanitë, ku çdo javë po bëhen shkurtime të punonjësve.

“Të paktën dy ndërmarrje në javë bëjnë shkurtime të vendeve të punës ose edhe mbyllje të një pjese të linjave të prodhimit. Sektori më i goditur është ai i linjës së këpucëve, i cili është në një kufizim total të prodhimit të këpucëve apo veshjeve të këmbës. Për ne është një dhimbje e madhe, pasi këto punëmarrës janë pjesë e aseteve të firmave tona dhe është investuar për formimin e këtyre personave që të jenë në cilësinë e duhur dhe të kuptojnë se çfarë duhet të prodhojnë. ”

Referuar anketës së zhvilluar pak ditë më parë nga Pro-Eksport Albania me anëtarët e saj, afro 88.4 për qind e fabrikave të veshjeve dhe të këpucëve në vendin tonë shprehen se pandemia COVID-19 ka ndikuar shumë negativisht apo negativisht në biznesin e tyre. Ndërsa ndër problemet më të mëdha që has sot sektori, është rritja e kostove, ulja e prodhimit, mungesa e likujditetit dhe mungesa e klientëve.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.