Kriza në tregun e fluturimeve – Ulje e numrit të pasagjerëve, kompanitë që dominuan tregun
Korriku mbeti një muaj i vëshitrë në drejtim të tregut ajror për shkak të situatës së krijuar nga COVID-19. Të dhënat zyrtare nga Aeroporti Ndërkombëtar “Nënë Tereza” dhe të raportuara nga Autoriteti i Aviacionit Civil tregojnë se gjatë korrikut udhëtuan përmes TIA-s 151.677 pasagjerë, nga të cilët 26,881 janë pasagjerë të fluturimeve Charter. Kjo shifër është ndjeshëm më e ulët, nëse e krahasojmë me korrikun e vitit që shkoi, ku u raportuan 385.388 udhëtarë. Praktikisht, politikat e shumë shteteve për të ndaluar lëvizjen e qytetarëve reflektojnë një ulje të numrit të pasagjerëve me 233,711.
Ndërkaq, pavarësisht tkurrjes së tregut janë disa kompani që kanë dominuar fluturimet. Më konkretisht, bazuar në të dhënat e mësipërme, kompania “Wizz Air” zotëroi tregun me 33% te totalit dhe një numër prej 149,488 pasagjerë. Ndërkohë që, pas saj renditen fluturimet charter, që zotërojnë 18% të tregut. Në vendin e tretë renditet kompania italiane Blue Panorama, që zotëron 13% të tregut total të fluturimeve, ndërkohë që 2 kompanitë me capital shqiptar, që janë Albawings dhe Air Albania zotërojnë tregun me 10 % dhe 9%.
Aktualisht, pjesa më e madhe e shteteve kanë kufizuar lëvizjen e lirë të shtetasve shqiptarë, duke lejuar futjen në territorin e tyre vetëm për ata që zotërojnë leje të përhershme qëndrimi. Këto vendime janë dinamike dhe varen nga shifrat që autoritetet shëndetësore raportojnë për të infektuarti aktivë me COVID-19, por deri më tani gjasat për të rikthyer lëvizjen e lirë janë të pakta, përsa kohë vendi ynë raporton shifra të larta të të prekurve nga infeksioni.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.