Vazhdojnë “negociatat”! Zyrtarët e BE dëgjojnë kushtet e palëve
Dita e martë ka qenë mjaft e ngjeshur, për zgjidhjen e krizës politike në vend. Dy eurodeputetët, Knut Fleckenstein dhe David McAllister kanë zhvilluar takime me përfaqësuesit e partive kryesore. Takimi në kryesinë e Kuvendit me kryeministrin Edi Rama dhe kryetarin e Kuvendit Ilir Meta, ka zgjatur rreth 60 minuta.
Kryeministri Rama, në këtë takim, ishte i shoqëruar nga kryetari i grupit të PS, Gramoz Ruçi dhe nga nënkryetari i grupit, Taulant Balla. Ndërsa Ilir Meta, shoqërohej nga ministri i Drejtësisë, Petrit Vasili dhe nga kryetari i grupit parlamentar, Luan Rama. Në takimin me negociatorët, Rama dhe Meta kanë diskutuar mbi mundësitë e daljes nga kriza politike.
Më pas, dy negociatorët i janë drejtuar selisë blu, ku kanë zhvilluar një takim me kryetarin e opozitës, Lulzim Basha, i cili shoqërohej nga deputetët Oerd Bylykbashi dhe Gerti Bogdani. Takimi ka zgjatur rreth 90 minuta dhe negociatorët kanë dëgjuar të gjitha kërkesat e opozitës. Eurodeputetët, pasi kanë dëgjuar të gjitha palët janë shprehur se do të shqyrtojnë të gjitha mundësitë për të arritur marrëveshjen dhe për t’i dhënë fund krizës politike.
Më pas takimet janë spostuar në Pallatin e Kongreseve ku David McAllister ka zhvilluar një takim vetëm me kreun e opozitës. Ndërsa Knut Fleckenstein ka zhvilluar një takim me Ramën, Metën dhe ambasadorët Donald Lu dhe Romana Vlahutin. Ka qenë kreu i opozitës i cili ka përfunduar takimin i pari dhe ka thënë që ende nuk kanë nisur negociatat.
Ndërkohë që burime nga PD bëjnë me dije se kërkesa e opozitës për qeveri teknike nuk është ndryshuar. Më pas nga Pallati i Kongreseve është larguar edhe Kryeministri Rama dhe Kreu i Kuvendit Ilir Meta të cilët nuk kanë dashur të japin asnjë koment. Të fundit janë larguar negociatorët të cilët vetëm kanë uruar “natën e mirë”.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.