Kryeministri bën bilancin e 2018: Rritja ekonomike më e larta në rajon! U punësuan 262 mijë persona, 34 mijë vetëm nga zyrat e punës
Rritja ekonomike pozitive, punësimi i lartë e niveli i ulët i papunësisë ishin tre elementet që evidentoi kryeministri Edi Rama në daljën para medias me rastin e përmbledhjes së fundvitit.
Kryeministri evidentoi se rritja ekonomike e tremujorit të tretë ishte 4.5 %, më e larta që prej vitit 2013 dhe gjithashtu edhe konsumin final të popullatës që është rritur me afro 4 % krahasuar me një vit më parë.
“Është e rëndësishme të theksohet është se është një rritje ekonomike cilësore sepse ka ardhur si rritje strukturale e shëndetshme. Ekonomia shqiptare sot është shumë më konkurruese se 5 vite më parë, gjë që e faktojnë një mori shifrash” tha kryeministri.
Duke u ndalur te punësimi, kryeministri tha se janë 262 mijë të punësuar të e regjistruar më shumë. “Nuk flasim për statistika të dala në anketat e punësimit por flasim për 262 mijë të punësuar më shumë në regjistrat e shtetit që paguajnë sigurime shoqërore dhe shëndetësore dhe plus taksa kur janë mbi rrogën 300 mijë lekë të vjetra. Vetëm nga zyrat e punës në fakt këtë vit janë punësuar 34 mijë e 604 persona.
Dhe të dyja shifrat që dhashë i kam edhe për ata që thonë ku janë ato 300 mijë vendet e punës. Sigurisht që 262 mijë nuk janë 300 mijë por janë shifra lehtësisht të verifikueshme duke parë regjistrin e sigurimeve shoqërore të Shqipërisë” tha kryeministri. Edhe sa i përket shifrës së papunësisë, kryeministri evidentoi se kemi shifrën më të ulët historike dhe se për herë të parë kemi punësim në sektorin jobujqësor më shumë se në atë bujqësor.
Duke përmendur raportet e Bankës Botërore, kryeministri evidentoi se borxhi publik është nën kontroll dhe në trajektore rënëse.
Vijon…
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.