Kryeministri Rama lajmërim nga SHBA: “Fillojmë vaksinimin në dy muajt e parë të 2021”
Kryeministri Edi Rama ka bërë me dije nga SHBA-ja ku ndodhet për vizitë se ka kryer një takim të drejtpërdrejtë me Drejtorin Ekzekutiv të firmës Pfizer në bashkëpunim me BioNTech, e cila momentalisht ka një nga vaksinat më të sigurta në treg dhe që ka marrë autorizimin e parë në një vend perëndimor si Britania e Madhe.
Shefi i qeverisë bën me dije se po projektohet që vaksinimi në vendin tonë, të nisë në dy muajt e parë të vitit 2021, ndërkohë që përveç vaksinës së Pfizer po diskutohet edhe për ato të kompanive të tjera si Moderna dhe Astrazeneca.
Sipas Ramës kërkesa globale është marramendëse dhe se do të bëhet çdo përpjekje që Shqipëria të mos mbetet mbrapa në radhën e gjatë të përpjekjeve:
Njoftimi i Ramës:
“Takimi pozitiv me bosin e Pfeizer, Albert Burla, në qendrën e kompanisë prodhuese të vaksinës në Nju Jork, përmbylli komunikimet tona të kësaj vizite kërkimore për të siguruar vaksinën për Shqipërinë – një sfidë e jashtëzakonshme në kushtet e një kërkese globale marramendëse.
Prodhimi është ende shumë më i ulët se sa kërkesa botërore! Por ambicia jonë është mos mbetemi mbrapa në radhën e stërgjatë të shteteve që kërkojnë vaksinën! Përveç kanalit të sapohapur për vaksinën Pfeizer do hapim në vijim edhe kanalet për vaksinat Moderna dhe Astrazeneca.
Ambicia jonë është që brenda dy muajve të parë të vitit të ri të nisim vaksinimin! Duket e pamundur po ne do t’ia dalim,pavarësisht vështirësisë së skajshme në këtë situatë për të gjithë, ku sidoqoftë vendet më të vogla e me të ardhura më të ulëta janë dhe më të dizavantazhuarat”, shkruan Rama.
Ashtu siç është bërë e ditur më herët, vaksina do të jetë falas. Shqipëria është pjesë e aleancës GAVI dhe nëpërmjet mekanizmit COVAX ka siguruar tashmë 1,114,000 doza vaksine (1 qytetarë bën dy doza, pra bëhet fjalë për 570 mijë qytetarë ose 20% e popullatës që janë dhe grupet vulnerabël).
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.