Kryeministri Rama paralajmëron ndërtuesit: “Riparoni pallatet e dëmtuara ose përndryshe do të shkoni në burg”
Në mbledhjen e sotme të krijimit të Komitetit Kombëtar të Ndërtimit, ku të gjithë aktorët publikë vendimmarrës u mblodhën në tryezën e Këshillit të Ministrave të shumta ishin mesazhet dhe direktivat që u dhanë për menaxhimin e situatës emergjente të shkaktuar si pasojë e tërmetit vdekjeprurës.
Në një tryezë të hapur ku të gjithë patën mundësinë të merrnin fjalën për të shpjeguar gjendjen nga ana e tyre e ekspertizës, kryeministri Rama ka dhënë një paralajmërim shumë të fortë për të gjithë ndërtuesit dhe pronarët e pallateve.
Pallatet që kanë pësuar dëme, jo të konsiderueshme duhet të rikuperohen nga vetë ndërtuesit ose në të kundërt tha ai, ata do të shkojnë në burg:
“Riparimet janë pjesa më e madhe dhe kushtojnë shumë. Inventari është shumë i rëndësishëm, prandaj kemi thirrur ekspertë të huaj për shkak të kësaj lukunie që bën gam gam. Besimi sot te ndërtuesit është përtokë për shkak të imazhit që krijohet.
Por godinat e reja e kanë përballuar testin. Edhe diçka, ata që i kanë ndërtuar ata që janë dëmtuar, të shkojnë ti riparojnë ose të përgjigjen para ligjit dhe të shkojnë në burg. Se nuk ka mundësi të riparojmë pallate që kanë shfaqur dëme të rikuperueshme se janë bërë gabime në zbatim. Edhe në këtë kategori ka jo pak dhe të vijnë dhe ata që i kanë bërë dhe ti riparojnë, ata që janë të riparueshme.
Do të bëjmë dënimin me burg 7-15 për ata që shkelin lejen e ndërtimit. Gjithashtu arkitektët që nuk e denoncojnë ndërtuesin por i shkojnë nga pas, ata janë gardiani. Por edhe përgjegjësi për konstruksionin. Kjo ka qenë një betejë e humbur për vete, e kam humbur…po nuk u vendosën sanksione të forta. Sanksionet duhet të jenë të egra si tërmeti, në vend se ta hanë familjet e pafajshme ta hanë ata që shkelin ligjin” tha ai.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.