Kryeministri takon qytetarët në Elbasan. Drejtësia, Rama: “Gjyqtarët janë përgjegjës, shteti i së drejtës nuk ndërtohet në dy mandate”

Kryeministri Edi Rama, ka zhvilluar këtë të dielë  një bashkëbisedim me qytetarët e Elbasanit, ku u fokusua në pastrimin e drejtësisë nga gjyqtarë e prokurorët e korruptuar. Korrupsionin në drejtësi Rama e cilësoi si faj të kastës së gjyqtarëve dhe prokurorëve teksa shtoi se shteti i së drejtës nuk mund të ndërtohet vetëm në dy mandate

“Te drejtësia kemi arsye të jemi kryelartë, pavarësisht se disa njerëz e kanë padurimin shumë të madh dhe nuk arrijnë të fokusohen për të parë se ajo që kemi bërë ne në këto vite për të pasur një drejtësi funksionale është historike. Është gjëja që mbase vlerësohet shumë herë më pak se ç’vlen në të vërtetë. Rezultatet e kërkuara nuk janë ende qartësisht të dukshme, por po çlirohemi nga dhuna e ftohtë dhe e heshtur por shumë dëmtuese e një kaste gjykatësish dhe prokurorësh, që asnjëherë nuk kanë qenë në fokusin e reflektorëve të medias apo opinionit publik, sepse kanë qenë mbi të gjithë”

Kryeministri foli edhe për autonominë e spitaleve që e premton në marrjen e mandatit të tretë. Ai tha se  autonomia spitalore që në thelb ka pagesën e mjekëve sipas numrit të vizitave dhe operacioneve që kryen, do të nis nga spitali i ri rajonal i Fierit, ndërsa shtoi se nuk do të ketë nevojë për klinika private, pasi mjekët mund të qëndrojnë dhe punojnë përtej orarit.

“Ne kemi avancuar në rindërtimin e spitaleve dhe riorganizimin e linjave të furnizimit të tyre dhe tani duhet të hedhim këtë hap. Funksionimi i autonomisë spitalore do të vihet në jetë në spitalin rajonal të Fierit. Nuk mund të paguhen njësoj dy mjekë që punojnë në një spital dhe që njëri bën më shumë orë pune dhe tjetri më pak. Si organizohet gjithë kjo? Nga ana tjetër, për të mos humbur në debat teorik është shumë më e udhës të ndjekim rrugën praktike.”

Rama, gjatë takimit u ndal edhe te arsimi, veçanërisht te ai profesional  ku u  shpreh se po punohet për krijimin e kolegjeve profesionale, që do të shërbejnë për rritjen e aftësive të nxënësve që zgjedhin një profesion të caktuar.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.