Kryeministrja më e re në botë/ Finlanda zgjedh 34-vjeçaren Sanna Marin për të drejtuar vendin!
Socialdemokratët në Finlandë, që drejtojnë koalicionin qeverisës të 5 partive, zgjodhën ministren e transportit 34-vjeçare, Sanna Marin, për t’u bërë kryeministrja më e re e vendit, pas dorëheqjes së Antti Rinne. Kjo do ta bëjë atë lideren më të re që mban këtë post.
Rinne dha dorëheqjen më herët gjatë javës, pasi Partia e Qendrës, anëtar në koalicion, deklaroi se ka humbur besim te ai, si pasojë e trajtimit të dobët të një greve të firmave të shërbimeve postare.
“Kemi shumë punë përpara për të rindërtuar besimin. Kemi një program të përbashkët qeveritar, që mban koalicionin në funksion”, tha Sanna Marin.
Koalicioni, që mori detyrën 6 muaj më parë, ka rënë dakord të vazhdojë me programin, pasi Rinne dha dorëheqjen me kërkesë të Partisë së Qendrës.
Koha e ndryshimit të lidershipit vjen në një kohë të papërshtatshme për Finlandën, që mban presidencën e Bashkimit Europian deri në fund të vitit dhe luan rol të rëndësishëm në caktimin e një buxheti të ri për bllokun.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.