Ku të investosh? Malajzia vendi më i mirë në Botë, Çekia në Europë
Më shumë se 1 trilionë dollarë injektohen çdo vit nëpër botë në formën e investimeve të huaja direkte. Vende të ndryshme ofrojnë mundësi po aq të ndryshme për investitorët e huaj në varësi të politikave që ndjekin.
Banka Botërore vlerëson se, janë katër, faktorët kryesorë që nxisin investitorët të derdhin kapitalin e tyre në vende të huaja; burimet natyrore, tregjet, eficenca dhe asetet strategjike, siç janë teknologjitë apo markat.
Një studim i fundit i Us News dhe World Reports në bashkëpunim me dy firma të tjera prestigjioze, rendit vendet më të mira në botë për të investuar. Renditja dhe pikëzimi merr për bazë; korrupsionin, dinamikën, qëndrueshmërinë ekonomike, ambientin e favorshëm të taksave, inovacionin, aftësinë e forcës së punës si dhe ekspertizën teknologjike.
Në vend të parë, si shteti më i mirë në botë për të investuar, klasifikohet Malajzia, me një diferencë të theksuar me ndjekësit. Malajzia tërheq çdo vit miliarda dollarë investime të huaja direkte, falë politikave pro biznesit të qeverisë dhe incentivave që i ofrohen investitorëve të huaj.
Në vend të dytë renditet, Singapori, i ndjekur nga republika Çeke, Danimarka dhe Polonia. Ndër vendet europiane pjesë e listës janë edhe Norvegjia, Hungaria, Sllovenia, Portugalia, Britania, Spanja dhe Holanda.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.