Kuba vendos tollonat-Qeveria racionon vezët, pulën, sapunin dhe produkte të tjera

Qeveria kubane deklaroi së fundmi se do të kontrollojë shitjet e disa produkteve të veçanta, kryesisht ushqimore dhe ato që lidhen me higjienën. Racionimi i ushqimit dhe produkteve të tjera bazë vjen si pasojë e mungesave të theksuara, rrjedhojë e embargos nga Shtetet e Bashkuara të Amerikës.

Raftet e dyqaneve në ishullin më të madh të Karaibeve kanë qenë çdo ditë e më shumë, bosh. Radhët e gjata nëpër dyqane për produkte si vezët, mielli apo pulat janë tashmë një panoramë krejt normale në Kubë, vend i cili importon 60-70% të ushqimit që konsumon.

Një sërë reformash në agro-bujqësi gjatë viteve të fundit kanë dështuar që të nxisin prodhimin. Ekonomia e kontrolluar nga shteti është tërësisht inefiçente, dhe kësaj inefiçence i duhet shtuar edhe përplasja dhjetëra vjeçare me Shtetet e Bashkuara të Amerikës.

Kriza e ngjashme në Venezuelë, ka dëmtuar edhe Kubën, pasi ndër vite është mbështetur nga ndihma e saj. Vendosja e tarifave shtesë, me Donald Trump në krye të ekonomisë amerikane ndërkohë, ka përkeqësuar ndjeshëm krizën e likuiditetit në vend.

Në Kubë tashmë njerëzit ka filluar t`i kapë paniku, nga frika se mos situata degradon, siç ndodhi dhe po ndodh në Venezuelë. Shumëkush i trembet faktit se duke qënë se ka mungesë ushqimesh, ato mund të fillojnë të shiten në treg të zi me çmime shumë herë më të larta.

Për këtë arsye, qeveria kubane ka vendosur që të racionojë produktet që një person mund të blejë. Racionimi vlen për produkte si pula, sapuni, vezët, orizi, fasulet apo salsiçet, që tashmë mund të blihen vetëm me kartën e tollonave në një sasi të kufizuar në muaj.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.