Kufiri ligjor për blerjen e alkoolit – Shqipëria, vendi me kufirin më të ulët në Europë, me moshën minimale …
Kufiri i moshës për të blerë alkool nuk është i njëjtë për të gjitha shtetet e Europës. Një studim i fundit në Mbretërinë e Bashkuar zbuloi se një në gjashtë prindër i lejojnë fëmijët e tyre të pinë alkool që në moshë 14 vjeç. Kjo pavarësisht udhëzimeve dhe sugjerimeve që nuk është e këshillueshme para moshës 15 vjeç.
Sipas studiuesve të “University College London” dhe “Pennsylvania State University”, kjo ndodh më së shumti tek prindërit e arsimuar, shumë prej të cilëve besojnë se duke u dhënë fëmijëve alkool, u mësojnë atyre si të pijnë.
Në Mbretërinë e Bashkuar, kufiri ligjor për blerjen e alkoolit është 18 vjeç, por zyrtari kryesor i Mjekësisë këshillon që adoleshentët ta provojnë alkoolin që në moshën 15 vjeç, sepse para kësaj moshe truri dhe trupi i tyre nuk është zhvilluar aq sa duhet.
Mosha minimale
Shumica e vendeve europiane kanë vendosur të njëjtën moshë minimale si të Britanisë së Madhe për blerjen e alkoolit, pra 18 vjeç. Vendi me kufirin më të ulët të moshës për blerjen e alkoolit rezulton të jetë vendi ynë, me 14 vjeç. Ndërsa Islanda, ka edhe kufirin më të lartë, 20 vjeç.
Nga të dhënat e mbledhura nga Organizata Botërore e Shëndetësisë, disa vende dallojnë ndërmjet alkoolit të blerë për konsum në lokale dhe në atë të blerë për t’u konsumuar jashtë tyre.
Në Finlandë, për shembull, të rinjtë mund të pijnë në ambiente të mbyllura në nëse kanë mbushur 18 vjeç, por jashtë tyre ato lejohet të blejnë pije alkoolike vetëm në moshën 20 vjeçare. Në Belgjikë, Danimarkë, Finlandë, Gjermani, Holandë, Norvegji dhe Zvicër, ka kufij të ndryshëm (më të ulët) të moshës për verë dhe birrë.
Në studim të rinjtë u pyetën nëse kishin pirë ndonjëherë alkool sa të ishin dehur. Në mesin e 15 vjeçarëve që thanë se ishin dehur më shumë se dhjetë herë, ndryshonin gjerësisht në të gjithë Europën.
Danimarka ka përqindjen më të lartë të 15-vjeçarëve që janë dehur të paktën dhjetë herë: 20% e djemve dhe 19% e vajzave. Holanda ka përqindjen më të ulët: 3% e djemve dhe 1% e vajzave.
Në çdo vend përveç Spanjës (10% e djemve dhe vajzave) dhe Islandës (4%), ka një dallim gjinor në rezultate. Kudo, përveç Finlandës (14% e vajzave dhe 13% e djemve), përqindja është më e lartë mes djemve sesa vajzave. Në Kroaci kjo është veçanërisht e theksuar (djemtë: 15% dhe vajzat 4%).
Por, sipas të dhënave, ka shumë pak lidhje mes kufirit ligjor për blerjen e alkoolit dhe dehjes së të rinjve, raporton “Euronews.”
G.Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.