Kujdesi për të moshuarit – Manastirliu: Rijetësojmë rrjetin e institucioneve të përkujdesit në të gjithë vendin
Ka përfunduar rehabilitimi i plotë i Shtëpisë së të Moshuarve në Shkodër, një investim me vlerë 110 milionë lekë. Ministrja e Shëndetësisë dhe Mbrojtjes Sociale, Ogerta Manastirliu, e shoqëruar nga ministri për Europën dhe Punët e Jashtme, Ditmir Bushati kanë vizituar ambientet e reja të këtij institucioni.
Sipas ministres, do të kryhen ndërhyrje në rrjetin e institucioneve të përkujdesit për të moshuarit në të gjithë Shqipërinë.
“Kemi detyrimin të investojmë për të moshuarit, për kontributin që kanë dhënë për shoqërinë, posaçërisht për ata që kanë më shumë nevojë, ndaj siç investuam këtu në Shkodër, rijetësojmë rrjetin e institucioneve të përkujdesit për të moshuarit pa përkrahje në të gjithë vendin”, u shpreh Ministrja Manastirliu.
Ndërkohë, sipas Manastirliut brenda 6 muajve pritet të hapet edhe shtëpia e të Moshuarve në Palasë. Ndërkohë, duke u ndalur te sistemi i reformimit të sistemit të shërbimeve të kujdesit shoqëror, ministrja tha se me miratimin e standardeve të shërbimit të asistencës shtëpiake për të moshuarit, është hedhur një hap i rëndësishëm për rritjen e kujdesit social për këtë kategori.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.