Kundër reformave të Macron – Punonjësit e hekurudhave në protesta që pritet të zgjasin 3 muaj
Shërbimet hekurudhore në Francë janë kthyer në kaos në fillim të kësaj jave, që përbën ditën e parë të protestave kombëtare që pritet të zgjasin 3 muaj. Kjo është beteja më e ashpër ndaj planit të Macron për të riorganizuar transportin shtetëror dhe liberalizuar ekonominë.
Sipas kompanisë shtetërore hekurudhore, SNCF, vetëm 1 në katër trena kanë qenë funksionalë në Paris dhe asnjë nuk operonte mes Francës, Zvicrës, Italisë dhe Spanjës.
Katër sindikatat kryesore të hekurudhave planifikojnë të bëjnë 2 ditë grevë në çdo javë në 3 muajt e ardhshëm, që do të sjellë një ndërprerje totale prej 36 ditësh, në përpjekje për të luftuar riorganizimin e hekurudhës shtetërore.
Sipas Qeverisë, kompania e mbytur me borxh, duhet të bëhet më efiçente përpara se shërbimet lokale dhe kombëtare për pasagjerët të hapen ndaj konkurrencës deri në vitin 2023, në përputhje me rregullat e Bashkimit Europian. Nëse Macron triumfon, atëherë do të mund të vazhdojë me ndryshimet e tjera të propozuara, përfshirë reformat në edukim dhe pensionet.
Ministrja e Transportit, Elisabeth Borne, i bëri thirrje sindikatave që të negociojnë, duke thënë se po e kthejnë situatën në një çështje politike. Sipas sondazheve, shumica e francezëve e shohin protestën si të pajustifikuar.
Macron kërkon ta transformojë kompaninë, që shton 3 miliardë euro borxh çdo vit, në një firmë fitimprurëse. Sipas sindikatave, borxhi është krijuar nga investimet e tepërta në trenat me shpejtësi të lartë (TGV). Punonjësit e kompanisë gëzojnë kushte të mira pune, përfshirë garancinë e mos-shkarkimit nga puna, rritje automatike të pagave çdo vit dhe daljen e parakohshme në pension.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.