Kundër TVSH-së për inputet – A do të rishikohet buxheti i kthyer në Kuvend?
Përjashtimi nga TVSH i inputeve bujqësore dhe vendosja e masës së rimbursimit në nivelin 6 për qind, tashmë pjesë e buxhetit të vitit 2019, është kundërshtuar nga Industria Ushqimore Shqiptare si dhe Qendra e Eksporteve Shqiptare.
Përmes një shkrese dërguar institucioneve kompetente mbi ndryshimet në ligj, Albanian Food Industry, shpjegon se ndryshimet sjellin situatën që ishte para vitit 2014, pasi produktet bujqësore do të blihen përmes autofaturimit (që përbën mbi 90% të shitjeve nga fermerët) me TVSH të njohur 6% dhe do të tregtohet tek konsumatori fundor me TVSH 20%.
Albanian Food Industry argumenton se kjo masë, do ta fusë në kolaps gjithë sektorin e bujqësisë dhe të ushqimit; do imponojë dhunshëm evazionin e detyruar nga operatorët në të gjitha nivelet; do rrisë importet e produkteve ushqimore duke pas sjellë uljen e prodhimit vendas.
Po ashtu, sqarohet se ky ndryshim do të impaktojë edhe në eksportet e produkteve bujqësore, pasi rimbursimi i TVSH së eksporteve efektivisht ka qenë qartësisht subvencion i produktit për njësi prodhimi.
Albanian Food Industri e konsideron si të paligjshme këtë iniciativë dhe me non sens të plotë me logjikën ekonomike dhe si e tillë kërkon që kjo të mos hyjë në fuqi.
Ndërkohë, dy ditë më parë President i Republikës, Ilir Meta, ka kthyer në Kuvend ligjin e buxhetit të shtetit, gjë që sjell detyrimin për rishqyrtimin e tij në komisione parlamentare dhe krijon hapësirë për të parë këtë pikë që kundërshtohet. Por nëse do të ketë një ndryshim apo jo, kjo mbetet për tu parë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.