Kur do jetë fundi i karantinës në Britani? Mbi 15 mln të vaksinuar, pritet një njoftim nga Johsnon gjatë javës
Kryeministri britanik do të gjykojë këtë javë mbi kohën e heqjes së masave të karantinës, pasi ka vaksinuar mbi 15 milionë të njerëzve më të cenuar, pavarësisht se Ministria e Shëndetësisë deklaroi se numri i vdekjeve është ende i lartë.
Me thuajse 25% të popullsisë në Mbretërinë e Bashkuar të vaksinuar me dozën e parë, me më pak se dy muaj kohë, Johnson ndodhet nën presion nga politikanët dhe bizneset që të rihapë ekonominë. “Na duhet të shohim të dhënat. Të gjithë duan të dalin nga kjo sa më shpejtë të jetë e mundur, por siguria është gjithashtu e rëndësishme”- tha Sekretari i Shëndetësisë, Matt Hancock, duke shtuar se ky gjykim do të merret këtë javë dhe kryeministri do caktojë planin më 22 Shkurt. Programi më i madh në histori i një vaksine, është parë si shansi më i mirë për të dalë nga pandemia që ka lënë mbi 2.4 milionë njerëz të vdekur në botë dhe ka shkundur ekonomitë. Britania ka vaksinuar 15.06 milionë njerëz me dozën e parë dhe 537,715 me regjimin e plotë me dy vaksina, që është imunizimi më i shpejtë për frymë në botë.
Hancock tha se Britania po bisedon me qeveri të tjera në botë mbi dhënien e certifikatave për britanikët, që tregon se janë vaksinuar dhe që mund të udhëtojnë lirshëm.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.