Kur do të kemi 24 orë ujë? – Strategjia: Arrihet në 2029-ën, nevojiten 1.5 miliardë euro investime, hendeku financiar 30%
Qeveria planifikon që furnizim 24 orë me ujë në të gjithë vendin të arrihet në vitin 2029. Gjithçka përcaktohet në Strategjinë Kombëtare të Sektorit të Furnizimit me Ujë dhe Kanalizimeve, 2020-2030 të nxjerrë për konsultim publik nga Ministria e Infrastrukturës dhe Energjisë.
Referuar dokumentit , deri në vitin 2019 kohëzgjatja mesatare e furnizimit me ujë përllogaritet në 14 orë në ditë, ndërkohë që përmes strategjisë synohet një rritje graduale e këtij treguesi, ku për vitin 2021 synohet një rritje e ndjeshme, duke arritur në 20 orë/ditë.
Në vitet në vijim, ritmi i rritjes së orëve të furnizimit me ujë është më i ngadaltë, duke arritur në vitin 2029 që parashikohet furnizimi i pandërprerë. Megjithatë, sektori paraqet një sërë problematikash, ndaj kërkohen edhe financime të mëdha për të arritur këto objektiva. Sipas përllogaritjeve kosto e përgjithshme për investime në infrastrukturë arrin në rreth se 1,5 mld euro, ku kostot kapitale zëne 91% të totalit dhe kostot korente 9%.
Ndërkohë që, duke pasur parasysh buxhetin vjetor të alokuar për ujësjellës-kanalizime dhe të zbatuar përmes institucioneve si MIE, FSHZH apo edhe bashki te veçanta është llogaritur norma vjetore e investimeve ne këtë sektor në masën 10 mld Lekë ne vit.
Sipas draft-strategjisë, duke marrë parasysh buxhetin vjetor 2023-2030 atëherë hendeku financiar përfundimtar është rreth 500 milion euro ose 30% e kostos totale të strategjisë.
Për këtë arsye strategjia kërkon që kostot e operimit, mirëmbajtjes dhe investimet në shërbimin me ujë të financohen përmes tarifave, taksave dhe transfertave, ku duket se peshën kryesore do e mbajë rritja e tarifave që paguhen nga qytetarët.
Më konkretisht, Strategjia Financiare parashikon një rritje prej 75% të tarifës së ujit nga viti 2019 deri në vitin 2030 me qëllim rritjen e qëndrueshmërisë financiare të shoqërive UK.
Sidoqoftë, sipas Strategjisë rritja mesatare e tarifave nuk e prek çështjen reale të përballueshmërisë, pasi tarifa mbetet nën pragun e përballueshmërisë gjatë gjithë periudhës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.