Kur do të kthehet jeta në normalitet? – Me ritmin e sotëm të vaksinimit do të duhen edhe 7 vite

Kur do të përfundojë pandemia? Kjo është pyetja e varur mbi gjithçka që kur Covid-19 pushtoi botën vitin e kaluar. Përgjigja mund të matet nga vaksinat.

Media prestigjioze Bloomberg ka ndërtuar bazën e të dhënave më të mëdha të vaksinave Covid-19 të dhëna në të gjithë botën, me më shumë se 119 milion doza të administruara në të gjithë globin. Zyrtarët amerikanë të shkencës si Anthony Fauci kanë sugjeruar se do të duhet 70% deri 85% mbulim i popullsisë që gjërat të kthehen në normalitet. Data-baza gjurmuese e Bloomberg tregon se disa vende po bëjnë përparim shumë më të shpejtë se të tjerët, duke përdorur 75% mbulim me një vaksinë me dy doza si objektiv.

Izraeli, vendi me shkallën më të lartë të vaksinimit në botë, po drejtohet për 75% të mbulimit në vetëm dy muaj. Shtetet e Bashkuara do të arrijnë atje në kohë për të uruar Vitin e Ri 2022 (megjithëse Dakota e Veriut mund të shkojë atje gjashtë muaj më shpejt se Teksasi). Me vaksinimet që ndodhin më shpejt në vendet e pasura perëndimore sesa pjesa tjetër e globit, botës do t’i duhen shtatë vjet me ritmin aktual.

Llogaritësi i Bloomberg siguron një pamje në kohë, e krijuar për të vënë në perspektivë normat e sotme të vaksinimit. Ai përdor mesataren më të fundit të vaksinimeve, që do të thotë se ndërsa numri i vaksinimeve rritet, koha e nevojshme për të kapur pragun e 75% do të bjerë.

Llogaritjet do të jenë të paqëndrueshme, veçanërisht në ditët e para të përdorimit, dhe numrat mund të shtrembërohen nga ndërprerjet e përkohshme.

Për shembull, data e synuar e Nju Jorkut u shty për pak kohë në 17 muaj këtë javë pasi një stuhi dimri pengoi disa të vaksinohen (tani është përsëri në 13 muaj). Po kështu, niveli i vaksinimit të Kanadasë ra me gjysmën në javët e fundit pas vonesave në dërgesat e vaksinave. Bazuar në normën e fundit të inokulimeve të Kanadasë do të duheshin më shumë se 10 vjet për të arritur mbulimin 75%. Kjo mund të shërbejë si një thirrje zgjimi për politikanët kanadezë dhe zyrtarët e shëndetësisë, por kjo nuk do të thotë se vendi është i dënuar për një dekadë në distancim shoqëror. Kanadaja ka kontrata për të blerë më shumë doza vaksinash për person se çdo vend tjetër, dhe normat e vaksinimit të saj pritet të rriten.

Ritmi ka të ngjarë të përshpejtohet më tej pasi vaksinat të bëhen më të disponueshme. Disa nga qendrat më të mëdha të botës për prodhimin e vaksinave në Indi dhe Meksikë sapo kanë filluar. Më shumë se 8.5 miliardë doza vaksine janë kontraktuar nga vendet përmes më shumë se 100 marrëveshjeve të ndjekura nga Bloomberg. Vetëm një e treta e vendeve madje kanë filluar fushatat e tyre të vaksinimit. (Bloomberg)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.