Kurse kualifikimi për punëkërkuesit e papunë – Ja sa herë mund të përfitojnë nga programi
Këshilli i Ministrave ka miratuar vendimin për pagesën e pjesëmarrje në kurset e formimit profesional për punëkërkuesit e papunë të cilët kanë dalë nga ndihma ekonomike.
Referuar vendimit, pagesa në masën 50% jepet për ndjekjen vetëm të një kursi, pra ata mund të përfitojnë vetëm një herë nga ky program. Punëkërkuesit të cilët do të marrin këtë pagesë prej 55 mijë lekësh për t’u riaftësuar në qendrat e formimit profesional do të vlerësohen nga një komision vlerësimi i përbërë nga të paktën 3 presona i cili do të ngrihet pranë zyrës së punësimit.
Ndërkohë, pagesa do të kryhet nga zyra përkatëse e punësimit, pas dërgimit të një konfirmimi nga institucioni ofrues i kursit i cili vërteton se pjesëmarrja në programin e formimit profesional është e rregullt.
Lidhur me rastet kur punëkërkuesit e papunë janë mbi 2 km larg institucioni të kursit të formimit profesional, sipas vendimit, zyra e punësimit do të paguajë edhe një kosto mujore transporti, në masën e përcaktuar në kuadrin ligjor për tarifat e udhëtarëve të transportit.
Ky program do të nisë zbatimin e tij këtë vit dhe kohëzgjatja e tij është parashikuar të jetë deri në 5 vjet.
Kryeministri Rama është shprehur më herët se përmes këtij programi synohet integrimi në tregun e punës të këtyre individëve të cilët dalin nga ndihma ekonomike si dhe rritja e punësimit përmes kësaj strategjie të re.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.