Kursi i këmbimit, leku zhvlerësohet ndaj valutave të huaja – Dollari rritet në nivelet e Marsit

Pas javësh të tëra, duket se forcimi i lekut është ndalur në tregun e këmbimit valutor, duke i hapur rrugë monedhave të huaja të rifitojnë disa prej humbjeve.

Përfituesit më të mëdhenj të kësaj ndalese kanë qenë dollari amerikan dhe paundi britanik, të cilët janë forcuar të dy me nga 0.5 pikë kundrejt lekut krahasuar me vlerën e ditës së djeshme.

Për dollarin, ky është një efekt i cili vjen nga rritja e kthimit të investimit në bono 10-vjeçare, e cila arriti në 3% gjatë kësaj jave. Kjo bëri që valuta e SHBA të kapë pikun e tre muajve të fundit. Në tregun vendas, tashmë dollari këmbehet për 105.8 lekë.

Ndërkohë, stërlina pavarësisht rritjes, është shumë larg niveleve të muajve të kaluar, duke u fiksuar në kursin e 147.5 lekëve. Në javët në vijim, negociatat me Bashkimin Europian për unionin doganor do të tregohen vendimtare për ecurinë e kësaj valute.

Sa i takon euros, ajo ka vijuar rritjen për ditën e dytë radhazi, por secilën herë me nga 0.1 pikë, duke bërë që të mbetet nën nivelin e 129 lekëve. Sot një euro këmbehet për 128.8 lekë në blerje dhe 129.5 lekë në shitje.

Një rritje me 0.4 pikë ka patur sot edhe dollari australian, ndërsa ai kanadez është forcuar me vetëm 0.2 pikë. Sakaq, franga zvicerane mbetet e fiksuar prej ditësh në nivelin e 107.3 lekëve.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.