Kursi i këmbimit, valutat rifitojnë vlerë ndaj lekut – Dollari amerikan në vështirësi

Tregu i këmbimit valutor gjatë ditës së enjte është hapur me forcimin e disa prej valutave kryesore, kundrejt monedhës vendase. Me përjashtim të dollarit, valutat e tjera kanë fituar vlerë ndaj lekut, por mbeten sërish larg nivelit të javës së kaluar, ndikuar prej shpenzimeve të festave të fundvitit.

Rënia e dollarit në tregun vendas përkon me dobësimin e valutës në tregjet botërore, shkaktuar nga një rënie e përqindjes së kthimit të investimit nga obligacionet 10-vjeçare.

Nga ana tjetër, euro, e cila e nisi javën në nivelin 132.2 lekë, sot regjistron 0.3 pikë më tepër kundrejt lekut. Në rekuperim paraqitet edhe valuta e Mbretërisë së Bashkuar, paundi, i cili sot ka fituar plot 0.2 pikë kundrejt lekut.

Ndërkohë, drejt një normalizimi të plotë duket se janë duke shkuar vlerat e Dollarit Kanadez dhe atij Australian. I pari ka rifituar 0.5 pikë kundrejt lekut, ndërsa dollari australian në krahasim me ditën e djeshme regjistron një vlerë 0.8 pikë më të lartë.

Një rritje të ndjeshme ka shënuar të enjten edhe franga zvicerane, duke u rritur me 0.7 pikë.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.