Kursimi i pastimuluar i energjisë/Ekspertët: Përjashtim nga taksat apo TVSH, lidhje me rrjetin e OSHEE
Pavarësisht se kërkesa për energji pëson rritje nga viti në vit, duket se masat që do të ndikonin në reduktimin e konsumit po ecin me hapa të ngadaltë, ndërkohë që ekspertët kërkojnë ndërmarrjen e politikave subvencionuese për nxitjen e investimeve për kursimin e energjisë nga konsumatorët.
Mungesa e lidhjes me rrjetin e shpërndarjes ka krijuar pengesa në këtë treg, por Çekrezi thotë se ka një angazhim serioz nga institucionet shtetërore dhe se shumë shpejt do të mundësohet blerja e energjisë së prodhuar nga bizneset apo familjarët.
Kjo zgjidhje është tejet e rëndësishme, por ekspertët sugjerojnë edhe ndërmarrjen e incentivave të tjera sikurse mund të jetë falja e taksave për bizneset që kryejnë këto lloj investimesh apo heqja e TVSH-së për këto impiante.
Aktualisht qeveria shqiptare nuk ka parashikuar asnjë masë incentivuese, por sipas zyrtarëve gjithçka do të fokusohet vetëm te ndërgjegjësimi i bizneseve mbi rëndësinë që ka një investim sipas parimit të eficencës së energjisë.
Nga ana tjetër, Shqipëria ka miratuar 2 ligje që kanë për qëllim reduktimin e konsumit të energjisë, por implementimi i tyre bëhet i vështirë, në një kohë sipas Komunitetit të Energjisë, deri në mars të këtij viti nga 16 akte nënligjore, 13 prej tyre nuk ishin miratuar ende.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.